Որևէ ստորաբաժանում Հադրութի հատվածում որևէ գործողության չի մասնակցել. ՊՆ պարզաբանումը

Հադրութի շրջանում մարտեր են ընթանում: Այդ մասին հաղորդում է WarGonzo նախագծի Տելեգրամյան ալիքը:

«@wargonzo նախագծի տեղեկություններով՝ զինված բախումներն ընթանում են արդեն մի քանի ժամ: Կան վիրավորներ»,-նշվում է հաղորդագրության մեջ:

ՀՀ ՊՆ-ն հաղորդագրություն է տարածել Արցախի Հադրութի շրջանի Տող գյուղի մոտ ռազմական գործողությունների մասին:  Հաղորդագրությունում ասվում է.

«Ադրբեջանական մի շարք լրատվամիջոցներ հայտնում են Հադրութի Տող գյուղի մոտակայքում հայ և ադրբեջանցի զինվորականների միջև վերսկսված մարտերի մասին։ Հաղորդվում է նաև երկու կողմի զոհերի և վիրավորների մասին։

Հիշեցնենք, որ Տող գյուղը գտնվում է ադրբեջանական ԶՈՒ ամբողջական վերահսկողության ներքո։

Արցախի ՊԲ-ն խստորեն պահպանում է հրադադարի ռեժիմը, որևէ ստորաբաժանում տվյալ հատվածում որևէ գործողության չի մասնակցել, ավելին՝ Արցախի ՊԲ ստորաբաժանումների հետ կապված որևէ արտակարգ միջադեպ չի գրանցվել։

Այդուհանդերձ, հայկական կողմը փորձում է հավելյալ տեղեկություններ պարզել, չբացառելով հավանականությունը, որ գործ ունենք ադրբեջանական տեղեկատվական սադրանքի հետ»։