Ժողովո՛ւրդ, 5 կետ, որը պետք է շուտափույթ իրականացնենք միասին. Արման Վարդանյան

«Միասնություն» շարժման ղեկավար Արման Վարդանյանը ֆեյսբուքյան իր էջում գրել է.

«Հայաստանում կատարյալ անիշխանություն է: Շարունակել այսպես ապրել անհնար է և անընդունելի։ Օրեցօր մեծանում է այն վտանգների թիվը, որ կախված է հայ ժողովրդի գլխին։

Անելանելի թվացող այս իրավիճակը պահանջում է կոնկրետ քայլերի հաջորդականություն, որպեսզի նորից կարողանանք ոտքի կանգնել, դիմակայել թշնամուն, երկիրը զարգացման ուղու վրա դնել և վերականգնել ազգային ու պետական անվտանգային համակարգը:

Հետևաբար, ես նշում եմ Հայաստանի Հանրապետության և հայ ժողովրդի գոյության համար 5 կետից բաղկացած անհետաձգելի օրակարգ, որոնցով պետք է առաջնորդվեն քաղաքական և պետական այրերը։ Ամենակարևորն է՝ բոլոր գործողությունները անել զուգահեռաբար․

1. Նիկոլ Փաշինյանի հրաժարականը:

2. Ռազմագերիների և մեր՝ թշնամու շրջափակման մեջ գտնվող կամավորականների վերադարձ ամենասեղմ ժամկետներում։

3. «Հայաստան Համահայկական հիմնադրամի» հաշվին եղած միջոցներով տասը հազարից ավելի վիրավորների բուժման, անհրաժեշտության դեպքում՝ արտասահմանում վիրահատությունների կազմակերպում, իսկ հաշմանդամներին՝ բարեկեցիկ կյանքով և աշխատանքով ապահովում։

4․ Սահմանների հստակեցում՝ հայաստանյան կողմի ակտիվ մասնակցությամբ։

5․ Նոր որակական անցումային կառավարության ձևավորում՝ բաղկացած մեծամասամբ նոր ու պրոֆեսիոնալ կադրերից։ Ուշքի՛ եկեք, մենք Հայրենիք ու ժողովուրդ ենք կորցնում»: