Որպեսզի որևէ մեկի մոտ կասկած չառաջանա, մենք տեսնյութ կհրապարակենք. Արթուր Դանիելյան

Աֆեկտի վիճակը գնահատելու համար հատուկ մասնագիտական խմբեր կան, ես դժվար կարողանամ ասել, թե ինչպես է որոշվել, որԱլեն Սիմոնյանը վեճի ժամանակ հուզված է եղել: Yerevan.Today-ի հետ զրույցում ասաց «Ադեկվադ» միաբանության նախագահ Արթուր Դանիելյանը՝ անդրադառնալով ՀՔԾ հայտարարությանը, որտեղ նշվում է, որ Դանիելյանին հարվածելու պահին Ալեն Սիմոնյանը գտնվել է հոգեկան խիստ հուզմունքի վիճակում:

«Այդ եզրակացությունը, մեղմ ասած, ծիծաղ է առաջացնում, նախ, որովհետև Ալեն Սիմոնյանը, ով պնդում է, որ ես իրեն հայհոյել եմ, ինչն, իհարկե, սուտ է, էդպես աֆեկտի մեջ ընկնող էր, պետք է նախորդ օրը Ազգային ժողովում աֆեկտի մեջ ընկներ, կամ իր կյանքի ընթացքում յուրաքնաչյուր անգամ, երբ իրեն շատերը իր իսկ ասած բառերով դիմել են, պետք է աֆեկտի մեջ ընկներ: Այնպես որ կա՛մ ինքը վերջին մի 10-15 տարին աֆեկտի մեջ է ապրել, կա՛մ էլ այդ ամենն արվում է, որպեսզի իշխանության ներկայացուցիչը խուսափի արդարադատությունից»,-նշեց Արթուր Դանիելյանը:

Մեր զրուցակիցը նաև ընդգծեց՝ հայտարարությունը ոչ միայն ծիծաղելի է, այլ նաև անտրամաբանական. «Ակնհայտ է, որ քննիչները, կատարելով իշխանության պատվերը, արդարացնելու են իշխանության ներկայացուցչին, ով ակնհայտորեն մեղավոր է, քրեորեն պատժելի հանցանք է գործել ու նաև այդ հանցանքի մեղքը բարդում է իրական տուժողի վրա»:

«Ադեկվադ» միաբանության նախագահը նաև ընդգծեց, որպեսզի որևէ մեկի մոտ կասկած չառաջանա, թե ինչ է իրականում տեղի ունեցել, պատրաստվում են տեսնյութ հրապարակել, իսկ հետագա անելիքները կորոշի փաստաբանը։