Եթե ոմանց հույսը 10 000-ով մարդ հրապարակ բերելն է, ապա դրանք արագ կփլուզվեն. Փաշինյան

ՀՀ վարչապետ Նիկոլ Փաշինյանը ճեպազրույցի ընթացքում նշեց․

«Կորոնավիրուսի համաճարակի հետ կապված իրավիճակը շարունակում է մնալ ծանր, թեւ կարող ենք ասել, որ ունենք բավական կայուն իրավիճակ: Խնդիրն այն է, որ ոչ մի երաշխիք չունենք, որ այս կայունությունը կպահպանվի, հետեւաբար միակ գործիքը կանոնները խստիվ պահպանելու մեջ է: Մենք շարունակում ենք լայնորեն քարոզչություն տանել, որ մեր հայրենակիցները պահպանեն երեք պարզ կանոնները»,-ասաց Փաշինյանը:

Նա նշեց, որ դիմակների գները աստիճանաբար ընկնում են. «Հաջորդ ուղղությունը առողջապահական կարողությունների զարգացումն է, որ հնարավորինս բարձրոակ ծառայություններ կարողանանք մատուցել կորոնավիրուսով վարակված մեր քաղաքացիներին: Մենք բավականին մեծ թվով թթվածնային սարքերի ձեռքներում ենք ունեցել պետական բյուջեի միջոցների հաշվին»,-ընդգծեց Փաշինյանը:

«Քանի դեռ թվերի շրջադարձային նվազում չունենք, չենք կարող ասել, որ բավարար չափով ենք հետեւում հակահամաճարակային կանոններին: Հիմա մեր վարակման գործակիցը 1,1-ի շրջանակում է, այսինքն 10 վարակված մարդը վարակում է 11 մարդու: Հիմա ես ուզում եմ դրա հակադարձ բանաձեւն առաջարկել, որ ամեն 10 հոգին, որ պահպանում են կանոնները, իրենք եւս 11 հոգու չեն վարակում»՞,-ասաց նա՝ կոչ անելով քաղաքացներին հնարավորության դեպքում միանալ դիմակներ բաժանելու արշավին։

«Դա կախված է համաճարակային իրավիճակից, բայց մեր հիմնական պլանն այն է, որ մեր քաղաքացիների համար փորձենք աշխատատեղեր ստեղծել ՀՀ-ում, որ նրանք այստեղ աշխատելու հնարավորություն ունենան, ոչ թե մեկնեն արտագնա աշխատանքի: Ամեն դեպքում, մենք խոստացել էինք, որ 100 նոր ծրագիր կիրականացնենք կապիտալ շինարարության ոլորտում, դրանց մի մասով արդեն մրցույթները տեղի են ունենում: Հույս ունեմ, որ արտագնա աշխատանքի մեկնող մեր քաղաքացիները հնարավորություն կունենան այստեղ աշխատել»,-ասաց նա:

Այո հավաքները հիմա սահմանափակված են, բայց ո՞վ է ասել, որ պոտենցիալ հավաքի մասնակիցները պետք է պարտադիր դժգոհություն արտահայտեին գործող կառավարությունից:

«Իսկ ո՞վ է ասել, որ այդ պոտենցիալ հանրահավաքի 10-20 կամ նույնիսկ 100 անգամ ավելի մեծ թվով մասնակիցներ դժգոհություն չպետք է արտահայտեին որոշ կոռուպցիոներների գործունեության հետ կապված: Ընդհանուր առմամբ սա պետք է հաշվի առնել: Պետք է ոմանք շնորհակալ լինեն, որ Հայաստանում արտակարգ դրություն է եւ հավաքներ անելու հնարավորություն չկա, որովհետեւ կարծում եմ՝ հեղափոխության կողմնակիցները առնվազն մի քանի դեպքերում զանգվածային հավաքներ կանցկացնեին եւ իրենց խոսքը կասեին առնվազն մի շարք կոնկրետ դեպքերի, անձանց գործունեության հետ կապված:

Թույլ տվեք նաեւ արձանագրել, որ որոշ այսպես ասած, այդ կարգի մեկնաբանություններ տվող շրջանակներ գերագնահատում են Հայաստանում հանրահավաքներ իրականացնելու իրենց ուժը: Որովհետեւ եթե հանրահավաք ասելով նկատի ունեն սահմանափակ թվով մարդկանց 10 հազար դրամով հրապարակ բերելը եւ նրանց հույսը դրանց վրա է, ապա իրենց հույսերը շատ արագ կփլուզվեն արտակարգ դրության ավարտից հետո»,-հայտարարեց Փաշինյնը:

Նա հավելեց, որ այսօր կառավարությունը խնդիր է դրել, որ մարդիկ քիչ վարակվեն. «Եվ եթե մենք այսօր դպրոցների, մանկապարտեզների, գիտական կենտրոնների գործունեությունն ենք անգամ սահմանափակել, կարծում եմ՝ այդ մեկնաբանությունը տեղին չէ:

Դեռ հարց է, թե հնարավորության դեպքում հեղափոխության կողմնակիցները, թե կառավարության հակառակորդները ավելի շուտ եւ ավելի շատ, մեծաքանակ հանրահավաքներ կանեն: Դեռ հարց է, թե ովքեր այդ հանրահավաքով շատ ավելի արագ հարցեր կլուծեին այդ հանրահավաքների միջոցով»,-ասաց վարչապետը: