Ինչո՞ւ Տիգրան Հակոբյանը Հ1-ի ատելության 21 կետերը չի ուզում տեսնել․ Zham.am

Zham.am-ը գրում է․ «ՀՌՀ նախագահ Տիգրան Հակոբյանը ֆեյսբուքյան իր էջում գրել է. «Ուշադիր կարդացեք: Սա Հանձնաժողովի կողմից իրականացվող եթերի մշտադիտարկման տվյալներն են (կրոնական, ազգային խտրականության դրսևորումներ, բռնության կոչեր և այլ օրենքով արգելված բովանդակություն պարզելու նպատակով): Առանձնացրել եմ նախորդ տարվա միայն նոյեմբեր-դեկտեմբերին մեկ հայկական հեռուստաընկերության մեկ քաղաքական հաղորդաշարի (հարցազրույցի ժանր) 21 հյուրերի խոսքից ընդամենը 21 շատ կարճ, բայց ելույթները բնութագրող մեջբերում: 21 հյուր, 21 նույնաբովանդակ ելույթ և մեկ թիրախ…

Որից հետո պարոն Հակոբյանը  թվարկում է, թե ինչ աստիճանի քննադատության է ենթարկվել Փաշինյանը վերը նշված հեռուստաընկերության եթերից:

Որից հետո նույն Հակոբյանը այն եզրահանգմանն է գալիս, որ ոչ մի նորմալ երկրում այդպիսի վիճակ թույլ չէր տվել: Դրան էլ ավելացնելով, որ նախկինում երբեք այդպիսի բան չի եղել:

Այն, որ Տիգրան Հակոբյանը «նկատում է» միայն ընդդիմադիր լրատվամիջոցի «ատելության քարոզի» հատկանիշները ցավոք նույնպես նորություն չէ մեր երկրի համար: Օրինակ՝ կարո՞ղ էր  պարոն Հակոբյանը  արձանագրել, թե ինչպես է   երկրի ղեկավարը հանրահավաքի ժամանակ հրահանգում ուժային կառույցների ներկայացուցիչներին,  իր հակառակորդներին «ծեփել պատին և պարկեցնել ասֆալտին»: Այդպիսի երևույթ, Տիգրան Հակոբյան, ո՞ր երկրում եք տեսել:

Կամ Հայաստանի 30 տարվա ընթացքում ո՞ր ղեկավարն է պարբերաբար խոսել «վնգստացող դատավորների» մասին: Իսկ դատարանների շրջափակման կոչի համար միայն,  ցանկացած երկրում այդպիսի ղեկավարին իմպիչմենտի կենթարկեին:

Հասկանալի է, որ Տիգրան Հակոբյանը այս ամենը «չի կարող նկատել», որովհետև ավանդույթն է այդպիսին: Հայաստանում  ՀՌՀ նախագահը միշտ պիտի «նկատի» միայն ընդդիմադիր լրատվամիջոցների թերությունները:

Այդպես է եղել, այդպես կա և հավանաբար այդպես  դեռ երկար կլինի, քանի դեռ մենք չենք կարողացել կառուցել, իրոք որ «նոր որակի Հայաստան»: Որտեղ  երկրի ղեկավարը դատավորներին «վնգստացող» չի անվանի ու իր  ընդդիմադիրներին էլ չի փորձի «պատին ծեփել ու ասֆալտին փռել»:

Բնականաբար  այդ Հայաստանում  ընդդիմությունն էլ իր հերթին քննադատության բնական սահմանները չի անցնի: Քանզի բնության մեջ, այդ թվում նաև հանրային կյանքում, գործում է Նյուտոնի 3-րդ օրենքը:

Իսկ պարոն Հակոբյանը հաստատ գիտի դրա մասին, պարզապես չի ուզում խոստովանել, որպեսզի Փաշինյանի կողմից «պատին չծեփվի ու ասֆալտին չփռվի»:

Սա է իրականությունը»։