23  09  2019

Փաշինյանի՝ այդքան գովազդված հանրահավաքին ընդամենը 10.000 մարդ էր մասնակցում. 168.am

Փաշինյանի՝ այդքան գովազդված հանրահավաքին ընդամենը 10.000 մարդ էր մասնակցում. 168.am

168.am-ը գրել է. «Կիրակի օրը՝ սեպտեմբերի 22-ին, ՀՀ վարչապետ Նիկոլ Փաշինյանը Լոս Անջելես՝ Հայաստանի Հանրապետությունից դուրս ամենամեծ հայաբնակ քաղաք կատարած իր առաջին այցի ընթացքում կազմակերպված հանրահավաքի ժամանակ City Hall-ի աստիճանավանդակից դիմեց մոտավորապես 10 հազար մարդու»,- այս մասին գրել է ամերիկյան «Daily News» լրատվակայքը՝ անդրադառնալով ՀՀ վարչապետի կազմակերպած հանրահավաքին Լոս Անջելեսի կենտրոնում գտնվող «Գրանդ Փարքում»:

«Մենք Հայաստանի համար նոր կերպար ենք ստեղծել,- Փաշինյանի այս խոսքերն է մեջբերել ամերիկյան կայքը՝ շարունակելով,- Մենք նոր կարգախոս ենք մշակել՝ հայ լինելը հետաքրքիր է, It’s cool to be Armenian»:

Կայքը ներկայացրել է նաև հանրահավաքին մասնակցած քաղաքային իշխանությունների ներկայացուցիչների՝ Փոլ Գրեգորյանի և Էրիկ Գարսետիի, ինչպես նաև Ադամ Շիֆի  ելույթներից որոշ դրվագներ:

«Ներկաների մեծ մասը, ծափահարելով և պարելով ավանդական երաժշտության, երաժշտական ներկայացումների ներքո, հիմնականում եկել էին հայաբնակ այնպիսի կենտրոններից, ինչպիսին Գլենդելն է, Բրբանկը, Փասադենան և Սան Ֆերնանդո հովիտը:  Լոս Անջելեսի կենտրոնից ավտոբուսները հասանելի էին դեպի համայնքներ»,- այսպես է նկարագրում կայքը հանրահավաքի կազմակերպչական մասը՝ միևնույն ժամանակ նշելով, որ 2000-ական թվականներին կազմակերպված մարդահամարի տվյալներով՝  Լոս Անջելեսի շրջանի հայկական բնակչությունը կազմում է 150 հազար մարդ, որոնցից մոտ 40 հազար հայ բնակվում է Սան Ֆերնանդո հովտում:

«Մենք այստեղ ենք պատվելու և ողջունելու նրան, քանի որ նա իրականացրեց հեղափոխությունն ու մաքրեց կոռուպցիան»,- Գլենդելից Հրայր Քութնույանի խոսքերն է մեջբերել DN կայքը: «Կառավարության, որը չի գողանում և խաղում, հեշտ չէ հասնել, բայց նա ապացուցում է, որ դա հնարավոր է»,- ասել է հանրահավաքին մասնակցելու նպատակով «Գրանդ Փարք» եկած Հրայր Քութնույանը:

«Գրանդ Փարկում», որն ըստ ամերիկյան աղբյուրների՝ կարող է ավելի քան 30.000 մարդ տեղավորել, ընդամենը 10.000 մարդ էր մասնակցում Փաշինյանի՝ այդքան գովազդված հանրահավաքին։

Ըստ պաշտոնական հրապարակված տեղեկատվության՝ Կալիֆոռնիա նահանգում է բնակվում ամերիկահայության մոտ 40 տոկոսը, 1.000.000 ամերիկահայ։

ՀՀ իշխանությունների և ամերիկահայ որոշակի շրջանակների ջանքերը՝ հնարավորինս մարդաշատ հանրահավաք կազմակերպելու համար, փաստորեն, ձախողվեց։ Այսպես ասած՝ PR-փուչիկն էլ իր հերթին պայթեց՝ այնպես, ինչպես համերգով մարդկանց հանրահավաքի բերելու հեղափոխական իշխանությունների գործողությունները։

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ