Վլադիմիր Պուտինը կգա՛ Հայաստան․ դեսպան

Ռուսաստանի Դաշնության դեսպան Սերգեյ Կոպիրկինը լրագրողների հետ զրույցում ասաց, որ տեղեկություն չունի ՀՀ ԴԱՀԿ նախկին պետ Միհրան Պողոսյանի կողմից քաղաքական ապաստան տրամադրելու վերաբերյալ:

«Եթե Միհրան Պողոսյանը Ռուսաստանում է,  չի նշանակում, որ նա ստացել է քաղաքական ապաստան, ինչքանով ես եմ հասկանում»,- նշեց նա։

Ինչ վերաբերում է «Մարտի 1-ի» գործով քննչական խմբի նախկին ղեկավար Վահագն Հարությունյանին, որը նույնպես գտնվում է Ռուսաստանում, դեսպան Կոպիրկինը խորհուրդ տվեց դիմել համապատասխան մարմիններին: 

Ամուլսարի խնդրին անդրադառնալով՝ դեսպանը նշեց, որ դա  Հայաստանի ներքին խնդիրն է:

«Չպետք է տուժի թե Հայաստանի գործարար համբավը, թե շրջակա միջավայրը: Կարծում եմ, դա Հայաստանի ներքին խնդիրն է, և Հայաստանի կառավարությունն ու ժողովուրդը բավականին իմաստուն են, որպեսզի կայացնեն ճիշտ որոշում»,-  ասաց Կոպիրկինը։

Անդրադառնալով Վլադիմիր Պուտինի՝ Հայաստան այցին՝ դեսպանը նշեց, որ Եվրասիական բարձրագույն խորհրդի նիստի անցկացումը Երևանում համատեղ որոշման արդյունք է, և ակնկալվում է ՌԴ նախագահ Վլադիմիր Պուտինի մասնակցությունը:

ՌԴ դեսպանը հավաստիացրեց, որ Պուտինի՝ Հայաստան չգալու վերաբերյալ տեղեկությունները չեն համապատասխանում իրականությանը։