Եթե վարչապետը չի կարող կամ չի ուզում հասկանալ, նա իր տեղում չէ․ Կարեն Բեքարյան

Հայաստանի առաջին դեմքի անունից Արցախին, Ղարաբաղյան հակամարտությանը, հակամարտության կարգավորման գործընթացին վերաբերող ցանկացած խոսք, քայլ, գործողություն պետք է լինի հաշվարկված, ռիսկերը գնահատած և զերծ պոպուլիզմից, միտինգային տրամաբանությունից, և իհարկե՝ կոմպետենտ ու տեղեկացված:

Սեպտեմբերի 2-ի շնորհավորանքը պետք է լինի անթերի բոլոր իմաստներով՝ իրավական, քաղաքական, նաև՝ որևէ կերպ չպարունակող խնդիրներ ընկալումների և մեկնաբանությունների դաշտում:

Եթե այս ամենը չի արվում կամ չի ստացվում, առաջանում է հարց ԱԳՆ-ի, տարաբնույթ խորհրդականների և օգնականների գոյության նպատակահարմարության:

Այսօր շնորհավորանքը պետք է ունենա հետևյալ բովանդակությունը.

Շնորհավորում ենք Արցախի մեր հայրենակիցներին, համայն հայությանը և մեր բարեկամներին ողջ աշխարհում ԼՂՀ հռչակման 28-րդ տարեդարձի առթիվ:

Այս տեքստի տարբերությունը վարչապետի տեքստից լավ կամ վատ, քիչ կամ շատ բառերի մեջ չէ: Արտգործնախարարը պետք է վերջապես կարողանա բացատրել վարչապետին այդ տարբերությունն ու դրա հետ կապված խորքային խնդիրները: Եթե չի կարողանում բացատրել, իր տեղում չէ, եթե վարչապետը չի կարող կամ չի ուզում հասկանալ, նա իր տեղում չէ:

Հ.Գ. Այսօրվա մեծ տոնի առիթն օգտագործեք ընթերցելու կամ վերընթեռնելու առնվազն՝ 1990 թ.-ի ապրիլի 3-ի ԽՍՀՄ օրենքը, 91-ի օգոստոսի 30-ի Ադրբեջանի գերագույն խորհրդի հռչակագիրը և 91-ի սեպտեմբերի 2-ի ԼՂՀ հռչակման փաստաթուղթը: Հուսամ, արդյունքում պարզ կլինեն, վերը նշված համատեքստում, «Սովետական Ադրբեջան» եզրույթի կիրառման և դրա հետ կապված տարատեսակ ընկալումներին վերաբերող խնդիրները…