27 08 2019

Իշխանությունները Քոչարյանի գործով ճնշում են դատավորներին․ РЕН ТВ



Ռուսական РЕН ТВ հեռուստաընկերությունն անդրադարձել է ՀՀ երկրորդ նախագահ Ռոբերտ Քոչարյանի դեմ դատական գործին` նշելով, որ ՀՀ իշխանությունները  ճնշում են գործով դատավորներին։

«Արդարադատությունը մեկ անգամ չէ Ռոբերտ Քոչարյանին անմեղ ճանաչել, բայց չնայած դրան՝ իշխանություններն անընդհատ նոր պատճառներ են գտնում Քոչարյանին ճաղերի ետևում պահելու համար: Այժմ նրանք ուղղակիորեն դատավորներին են հետապնդում, նրանց դեմ քրեական գործեր են հարուցվում, հալածանքներ իրականացվում մամուլի միջոցով»,- նշվում է ռուսական հեռուստաալիքի ռեպորտաժում։

«Ստացվում է, որ Փաշինյանը, ով այն ժամանակ ճաղերի ետևում էր հայտնվել, վրեժ է լուծում՝ փորձելով հասնել նրան, որ Քոչարյանը մեղավոր ճանաչվի։ Անհեթեթ է հնչում. երկրի գործող նախագահն արտակարգ դրություն հայտարարելու իրավունք ուներ, դրա համար էլ դատավորները փորձում են հանել մեղադրանքը, բայց Փաշինյանը թույլ չի տալիս»,- նշվում է ռեպորտաժում։

Հեռուստաընկերույունն անդրադարձել է նաև նոր աղմկահարույց նախագծին՝ նշելով, որ ՍԴ դատավորներին ցմահ և բարձր կենսաթոշակով գայթակղելով՝ առաջարկում են ինքնակամ հեռանալ՝ նրանց ավելի կառավարելի կադրերով փոխարինելու նպատակով։

Հեռուստաընկերությունը նաև հավելում է, որ Նիկոլ Փաշինյանն իրեն է ենթարկել ԶԼՄ-ներին, օրենսդիր և գործադիր մարմիններին, իսկ այժմ ամեն ինչ տանում է դեպի դատարանների անկախության վերացման:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ