Ժողովրդավարությունն աշխարհում նվազում է, ՀՀ-ում՝ աճում․ Freedom House

Ներկայացվել է տարբեր երկրներում ժողովրդավարության վիճակի վերաբերյալ Freedom in the World ամենամյա զեկույցը, որում ներառված է 195 երկիր։ Հայաստանը 1 տարում խոշորագույն առաջընթաց գրանցած երկրների առաջատար վեցնյակում 4-րդն է: 

Freedom House-ի զեկույցի հեղինակները նշել են, որ նախորդ տարի ազատության անկում է նկատվել, ժողովրդավարությունը նահանջում է։  Ուսումնասիրված երկրների ու տարածքների 44,1%-ը բնորոշվել է ազատ, 30,3%-ը՝ մասամբ ազատ, իսկ 25,6%-ը՝ անազատ:

Այդուհանդերձ, որոշ երկրներում «անակնկալ» դրական արդյունքներ են գրանցվել։ Փաստաթղթում նշվում է, որ անակնկալ բարելավում է եղել մի  Հայաստանում, Մալայզիայում, Եթովպիայում, Անգոլայում և Էկվադորում։

Հայաստանն առաջընթաց է գրանցել 6 միավորով, սակայն շարունակում է մնալ «մասամբ ազատ» երկրների շարքում:

«Զանգվածային ոչ բռնի ցույցերը Հայաստանում հանգեցրին վարչապետ Սերժ Սարգսյանի հրաժարականին: Դեկտեմբերին տեղի ունեցած խորհրդարանական արտահերթ ընտրություններից հետո խորհրդարանում մեծամասնություն կազմած բարեփոխիչները պարտավորվել են, որ կոռուպցիայի ու պաշտոնական դիրքի չարաշահման դեմ պայքարում կգերիշխի թափանցիկությունն ու հաշվետվողականությունը»,-ասվում է զեկույցում:

Տարածաշրջանում վատագույն ցուցանիշն է գրանցվել Թուրքիայում Իրանում ու Ադրբեջանում։ Այս երկրները ներառվել են անազատ երկրների շարքում: Անազատ է համարվել նաև ՌԴ-ն, մինչդեռ Վրաստանը ժողովրդավարության մակարդակով ճանաչվել է մասամբ ազատ պետություն, սակայն առաջընթացի անկում է ունեցել։