Չի կարող որևէ բան լինել, որը կսպառնա Արցախի ժողովրդի ֆիզիկական անվտանգությանը. Աննա Նաղդալյան

ՀՀ ԱԳ նախարարի պաշտոնակատար Զոհրաբ Մնացականյանն այս տարվա մայիսից պաշտոնը ստանձնելուց հետո  ունեցել է 23 պաշտոնական և աշխատանքային այց, նաև  ՀՀ-ում  անցկացրել է մոտ 150 առանձին հանդիպում, 53-ը՝ արտաքին գործերի նախարարների հետ: Այս մասին դեկտեմբերի 20-ին լրագրողների հետ զրույցում ասաց ՀՀ արտաքին գործերի նախարարության մամուլի խոսնակ Աննա Նաղդալյանը:

ՀՀ ԱԳՆ մամուլի խոսնակը  շեշտեց, որ Հայաստանը մեծապես կարևորում է բազմակողմ հարթակները՝ մեջբերելով Զոհրաբ Մնացականյանի խոսքը, թե «աճող պոպուլիզմի և ծայրահեղականության ներկա մարտահրավերներն ընդգծում են առավել բազմակողմ հարթակ ունենալու հրամայականը»:

Անդրադառնալով  ԵԱՀԿ ՄԽ խմբի աջակցությամբ  Միլանում տեղի ունեցած` Հայաստանի և Ադրբեջանի արտաքին գործերի նախարարների հանդիպմանը, Աննա Նաղդալյանը հիշեցրեց, որ դրա արդյունքում ընդունվել է հնգակողմ հայտարարություն, իսկ դրան հաջորդած նախարարական համաժողովում ելույթ ունենալիս Զոհրաբ Մնացականյանը նշել է՝ «խաղաղությանը նպաստող միջավայրը  էական նշանակություն ունի բանակցային գործընթացի համար», և որ այս առումով «նշանակալի ներդրում կլինի Դուշանբեում ձեռք բերված համաձայնության  և ավելի վաղ տեղի ունեցած  պայմանավորվածությունների իրագործումը»:

Նա նշեց, որ այն, ինչը ոմանց համար բիզնես է, մեր ժողովրդի համար մահացու գործիք է, և ՀՀ ԱԳՆ-ը մշտապես իր օրակարգում է պահում տարածաշրջանում սպառազինությունների մրցավազքի կանխարգելման օրակարգը: Հարցը բարձրացվում է տարբեր մակարդակներում՝ գործընկերների հետ հանդիպումներում և բազմակողմ հարթակներում: «Մեզ համար սկզբունքային դիրքորոշում է, որ սպառազինության մրցավազքը տարածաշրջանում պետք է կանխվի: Բայց մեր այս հայտարարությունը երբեք չպետք է շփոթել կարողությունների պակասի հետ: ՀՀ Զինված ուժերն ունի բարձր պատրաստվածություն, վճռականություն, ռազմատեխնիկական հագեցվածություն՝ երաշխավորելու Հայաստանի և Արցախի անվտանգությունը»,- ասաց նա: Ինչ վերաբերում է Բելառուսի նախագահ Ալեքսանդր Լուկաշենկոյի՝ Ադրբեջանին Ռուսաստանի կողմից զենք վաճառելու մասին հայտարարությանը, Աննա Նաղդալյանը նշեց, որ Բելառուսի նախագահի հայտարարություններին անդրադարձել են վարչապետի պաշտոնակատարը և նրա խոսնակը: «Նախարարը նշել է, որ զենքի վաճառքը և մատակարարումն ուղղակիորեն նպաստում է դրա կիրառմանը և կիրառման սպառնալիքին, և մասնակից պետություններն այս առումով պետք է վերանայեն իրենց գործելաոճը»,- հայտարարեց ԱԳՆ խոսնակը:

Անդրադառնալով կենսաբանական լաբորատորիաներին, խոսնակը նշեց, որ պետք է վերահաստատել, որ այդ լաբորատորիաները պատկանում են Հայաստանին «Լաբարատորիաները վերահսկվում են մեր կողմից, այդտեղ աշխատում են բացառապես հայ փորձագետներ: Դրանք ունեցել են և կունենան բացառապես քաղաքացիական բնույթ, և ռազմական ներկայության կարիք չկա»,- նշեց նա: Աննա Նաղդալյանը նաև ընդգծեց, որ ՀՀ-ն որևէ բանակցություն չի վարում իր տարածքում 3-րդ երկրի զինվորների տեղակայման մասին:

Հարցին, թե Մադրիդյան սկզբունքներն արդյոք մնո՞ւմ են օրակարգում, Աննա Նաղդալյանը հիշեցրեց, որ Հայաստանի դիրքորոշման համաձայն՝ բանակցությունները պետք է շարունակվեն ԵԱՀԿ Մինսկի խմբի շրջանակում, բացառապես խաղաղ ճանապարհով, իսկ առաջնահերթությունը Արցախի անվտանգությունն ու կարգավիճակն են, ինչպես նաև երկարաժամկետ խաղաղության հաստատման մեջ Արցախի վճռորոշ ձայնը: «ԱԳ նախարարները պայմանավորվել են պահպանել հանդիպումների դինամիկան, և բոլոր հանդիպումներից հետո մենք հստակ ներկայացրել ենք արդյունքներն ու պայմանավորվածությունները»,- նշեց ԱԳՆ քարտուղարը:

Պատասխանելով այն հստակեցնող հարցին, թե կարգավիճակը կարելի է տարբեր կերպ հասկանալ, եւ ասվածից արդյոք հետևո՞ւմ է, որ ինքնորոշման իրավունքը երկրորդ պլան է մղվել, Աննա Նաղդալյանը շեշտեց, որ չի կարող որևէ բան լինել, որը կսպառնա Արցախի ժողովրդի  ֆիզիկական անվտանգությանը:

Մեկնաբանելով հայկական լրատվամիջոցներում իրարանցում առաջացրած Միլանում հանդիպման արդյունքների վերաբերյալ Ադրբեջանի ԱԳ նախարարի հայտարարությունը՝ Աննա Նաղդալյանը հիշեցրեց, որ այն ամենը, ինչի մասին Մամեդյարովը հայտարարել է դեկտեմբերի 19-ին, Զոհրաբ Մնացականյանն ասել է դեռևս դեկտեմբերի 6-ին՝ հանդիպումից հետո. խոսքը վերաբերել է հանդիպումների դինամիկայի շարունակման մասին փոխըմբռնման հասնելուն եւ հնգակողմ հայտարարության տեքստի համաձայնեցմանը:

ԱԳՆ մամուլի քարտուղարը հիշեցրեց, որ Հայաստանում բազմիցս են խոսել բանակցությունների առաջմղման համար մթնոլորտի ստեղծման անհրաժեշտության մասին: Ինչպես նաեւ պայմանավորվածությունների կատարման, ռազմատենչ հայտարարություններից հրաժարվելու անհրաժեշտության մասին: Լավ է, որ Ադրբեջանից առաջին անգամ նման մի բան հնչեց, հավելեց Նաղդալյանը:

Ինչ վերաբերում է Ղազախի և Աղստեւի տեղամասերում բանակային ստորաբաժանումները սահմանապահ ուժերով փոխարինելու Ադրբեջանի իշխանությունների որոշմանը, ապա ԱԳՆ-ում կարծում են, որ առայժմ վաղ է գնահատական տալ:

Պատասխանելով հարցին այն մասին, թե նախօրեին հայտնի դարձավ, որ Ղրղզստանը ՀԱՊԿ-ում կաջակցի Բելառուսի թեկնածությանը, Նաղդալյանն ասաց, որ վերջնական որոշում դեռ չկա, հետևաբար, անհնար է առանձին անձանց վերաբերյալ կարծիք հայտնել:

Ինչ վերաբերում է ՀԱՊԿ գլխավոր քարտուղարի պաշտոնում հավանական թեկնածու, Բելառուի Անվտանգության քարտուղար Ստանիսլավ Զասի այցին Երևան, ապա ԱԳՆ-ն հայտնեց, որ այս պահին նման այց չի նախատեսվում: Ինչ վերաբերում է ԱԳՆ նախարարի տեղակալ Կարեն Նազարյանի` Վատիկանում ՀՀ դեսպան նշանակվելու մասին տեղեկությանը, Աննա Նաղդալյանը պատասխանեց. «Դեսպանների փոփոխումը՝ հետկանչը, նշանակումը բնականոն բնույթ է կրում նախարարությունում: Դեսպանների նշանակման կարգը տեղի է ունենում ՀՀ սահամանադրության հիման վրա և դիվանագիտական ծառայության մասին օրենքի շրջանակներում: Մինչև գործընթացի ավարտը մենք դեսպանների մասին նշանակման վերաբերյալ որևէ մեկնաբանություն հրապարակային չենք տալիս»: