Թրամփը զորք է ուղարկել սահման՝ ներգաղթյալների «քարավանի» դեմ

Մեքսիկայի իշխանությունները հրաժարվել են ավտոբուսներ տրամադրել Հարավային Ամերիկայից դեպի ԱՄՆ սահման ուղևորվող ներգաղթյալների «քարավանի» առաջին խմբի անդամներին՝ նշելով, որ նրանք ստիպված կլինեն մնացած 1.500 կմ տարածությունը ոտքով անցնել, հաղորդում է Daily Mail-ը։

Ինչպես նշվում է, 4000 մարդուց բաղկացած «քարավանը», որում կան կանայք, երեխաներ ու հղիներ, շարժվում է դեպի Մատիաս Ռոմերո մեքսիկական քաղաք, որտեղից էլ ուղևորվելու է դեպի ԱՄՆ-ի սահման:

«Քարավանի» մյուս խումբը, որում ևս հազարավոր մարդիկ կան, առաջինից  321 կմ հետ է՝ Տապաչուլա քաղաքում։

Ավելի վաղ «քարավանի» կազմակերպիչները հայտարարել էին, որ մեքսիկական իշխանություններն իրենց խոստացել են 14 ավտոբուս տրամադրել:

Միաժամաակ ԱՄՆ նախագահ Դոնալդ Թրամփը Մեքսիկայի սահման է ուղարկել 100 զինծառայողի, որոնք սպասում են բազմահազարանոց «քարավանին»: Սահմանին կտեղակայվի ամերիկյան 7.000 հոգանոց զորք, Թրամփն ավելի վաղ հայտարարել էր, որ ցանկանում է զինծառայողների թիվը հասցնել 15.000-ի: ԱՄՆ նախագահը դեմ է ներգաղթյալներին ապաստան տալուն և նրանց նախազգուշացրել է, որ ամերիկացի զինծառայողներն ի պատասխան իրենց ուղղությամբ նետված քարերի՝ կրակ կբացեն «քարավանի» անդամների ուղղությամբ։

«Սակայն հույս ունեմ, որ նման բան տեղի չի ունենա: Միաժամանակ պետք է ասեմ՝ եթե որևէ մեկը քարեր նետի զինծառայողների ուղղությամբ՝ այնպես, ինչպես եղավ Մեքսիկայում ու դրա հետևանքով բազմաթիվ մեքսիկացի ոստիկաններ ու իրավապահներ տուժեցին, մենք կմտածենք կրակ բացելու մասին»,-Ս պիտակ տանը լրագրողների հետ զրույցում նշել է Թրամփը։