Փոխարտգործնախարարը Բոլթոնի հայտարարությունում վտանգ չի տեսնում

Քննարկումները շարունակվում են, և քանի դեռ որոշում չկա, ոչինչ չեմ կարող ասել: Հոկտեմբերի 31-ին լրագրողների հետ զրույցում անդրադառնալով ՀԱՊԿ գործող գլխավոր քարտուղար Յուրի Խաչատուրովի փոխարինման գործընթացին ասաց ՀՀ ԱԳ փոխնախարար Ռուբեն Ռուբինյանը:

Հիշեցնենք, որ վերջերս ՀՀ-ն ձեռնարկեց ՀԱՊԿ գործող գլխավոր քարտուղար Յուրի Խաչատուրովի փոխարինման գործընթացը: Մեկնաբանելով գնահատականները, թե վերոնշյալն ազդելու է ՀԱՊԿ-ում ՀՀ դիրքերի թուլացմանը, Ռուբեն Ռուբինյանը վստահեցրեց.

«ՀԱՊԿ-ում ՀՀ դիրքերը շատ ուժեղ են: Դրանք ավելի ուժեղ են, քան երբևէ եղել են»:

Փոխնախարարը հրաժարվեց մեկնաբանել ԱՄՆ նախագահի անվտանգության հարցերով խորհրդական Ջոն Բոլթոնի Հայաստանում արած հայտարարությունները:

«Ես ՀՀ փոխարտգործնախարարն եմ, ոչ թե ԱՄՆ-ի, չեմ ուզում մեկնաբանել պարոն Բոլթոնի հայտարարությունը: Ես կարող եմ ասել, որ Արցախի հարցի ցանկացած լուծում պետք է լինի համաձայնեցված եւ ընդունելի Հայաստանի Հանրապետության եւ Արցախի ժողովուրդների համար։ Իսկ թե որ սկզբունքներն են ընդունելի հայկական կողմի համար, հայտնի է բոլորին»,- ասաց նա։

Փոխարտգործնախարարը նաև նշեց, որ այդ հայտարարություններում որևէ վտանգ չի տեսնում: Ռուբեն Ռուբինյանն անդրադարձավ նաև դեսպանների հետ կանչման հարցին՝ նշելով, որ օդիոզ դեսպանները հետ են կանչվելու:

Հարցին՝ ճի՞շտ են մամուլի տեղեկությունները, թե առաջիկայում հետ է կանչվելու նաեւ Դանիայում եւ Նորվեգիայում ՀՀ դեսպան Ալեքսանդր Արզումանյանը, Ռուբեն Ռուբինյանը պատասխանեց՝ ոչ: