ՖՄԿ գագաթնաժողովի բանաձևերից մեկում ԼՂ մասին ձևակերպում կլինի. ԱԳՆ

Ֆրանկոֆոնիայի միջազգային կազմակերպության նախարարների նիստին լրագրողների հետ զրույցում Հայաստանի ԱԳՆ Զոհրաբ Մնացականյանն ասաց՝ շատ հպարտ է, որ անկախ ներքաղաքական զարգացումներից, ապահովվեց քաղաքական կամքը՝ լավագույնս կազմակերպելու Ֆրանկոֆոնիայի միջազգային կազմակերպության գագաթնաժողովը: 

Մնացականյանն ընդգծեց, որ ֆրանկոֆոնիայի գագաթաժողովի շրջանակներում Հայաստանի համար կարևոր ուղղություն է աֆրիկյան երկրների հետ կապերի ամրապնդումը. «Այստեղ համագործակցության թեմաներն ու ոգին շատ լավն են և օգտակար են որպես հարթակ օգտագործելու համար, որպեսզի և՛ մենք ճանաչելի դառնանք Աֆրիկայում, և՛ ուսումնասիրենք այն հնարավորությունները, որտեղ մենք, որպես շուկա, կարող ենք ներխուժել: Ֆրանկոֆոնիան առիթ է  մեզ համար, թե՛ աֆրիկյան մայրցամաքում ավելի աշխուժություն դրսևորելու, թե՛ ներկա լինելու մայրցամաքում և աշխատելու բոլոր աֆրիկյան երկրների հետ»,-ասաց նախարարը:

Զոհրաբ Մնացականյանը տեղեկացրեց, որ գագաթնաժողովի կարևորագույն արդյունքներից մեկը լինելու է թվային տնտեսությունների համար պատասխանատուների ցանկի ստեղծումը. «Սա կոնկրետ արդյունք է, բայց ցանցը ցանց կմնա, եթե չկարողանանք ավելի կոնկրետ համագործակցություն ի հայտ բերել»:

Հարցին, թե արդյոք գագաթնաժողովի ընթացքում Արցախյան հիմնախնդրի մասին զեկույց-բանաձև լինելու է, նա պատասխանեց. «Կա 6 բանաձև, մի բանաձևը վերաբերում է նման քաղաքական հարցերին, և այնտեղ կտեսնեք ձևակերպում»,- նշեց նա: