Մոլդովայի նախագահ Իգոր Դոդոնին ժամանակավորապես հեռացրել են պաշտոնից

Մոլդովայի սահմանադրական դատարանը ժամանակավորապես հեռացրել է Իգոր Դոդոնին նախագահի պաշտոնից: Այս մասին գրում է «ՌԻԱ Նովոստի» գործակալությունը:

«Նշվում են հանգամանքներ, որոնք արդարացնում են նախագահի ժամանակավոր հեռացումը պաշտոնից՝ նախարարներ նշանակելուց հրաժարվելու պատճառով, որոնց թեկնածությունները 2 անգամ ներկայացվել են վարչապետի կողմից»,- ասել է դատարանի նախագահը:

Սեպտեմբերին վարչապետ Պավել Ֆիլիպը Դոդոնին էր առաջարկել երկու նախարարի թեկնածություն, սակայն նախագահը դեմ էր արտահայտվել այդ թեկնածություններին:

Մոլդովայի սահմանադրության համաձայն՝ նախագահն իրավունք ունի մեկ անգամ մերժել վարչապետի ներկայացրած թեկնածությունները: Երկրորդ անգամ մերժելու դեպքում նրան կարող են ժամանակավորապես հեռացնել պաշտոնից, որպեսզի նախարարների նշանակման մասին հրամանագիրը կարողանա ստորագրել կամ խորհրդարանի, կամ կառավարության ղեկավարը:

Դոդոնին արդեն երեք անգամ ժամանակավորապես հեռացրել են պարտականությունների կատարումից:

Մոլդովայի նախագահի ու կառավարության միջև դիմակայությունը շարունակվում է մեկ տարուց ավելի, պատճառն արտաքին քաղաքականության հարցում համաձայնության չգալն է՝ Դոդոնը Ռուսաստանի հետ մերձեցման կողմնակից է, իսկ կառավարությունն ու խորհրդարանական մեծամասնությունը՝ Արևմուտքի: