Արտակ Զեյնալյանը պնդում է՝ կընտրվի քաղաքապետ

«Լույս» դաշինքի քաղաքապետի թեկնածու Արտակ Զեյնալյանը, քվեարկելուց հետո պատասխանելով հարցին, թե «Իմ քայլը» դաշինքի հետ կոալիցիոն գործընկերություն պատկերացնո՞ւմ է, թե՞ ոչ, նշեց՝ քվեարկությունը կավարտվի, կտեսնենք արդյունքները և, ըստ այդմ, կկողմնորոշվենք, և կերևա, թե ինչ է տեղի ունենալու։

Արտակ Զեյնալյանը  ընտրակաշառքների մասին հարցին պատասխանեց. «Քվեարկության ավարտին դեռևս ութ ժամ է մնացել, և իմ հնչեցրած տեսակետները կարող են ազդել քվեարկության արդյունքների վրա, ուստի, որևէ հայտարարություն չեմ կատարի»: 

Զեյնալյանն ասաց, որ ԲՀԿ-ի ահազանգերի մասին չի լսել,տեղյակ չէ: «Միայն ոստիկանապետ Վալերիյ Օսիպյանի հայտարարության մի հատվածն եմ ընթերցել, վերնագրի մասով, և ըստ այդ հայտարարության՝ որևէ հակաօրինական բան չկա, ամբողջը չեմ հետևել»,- նշեց քաղաքապետի թեկնածուն։

«Եթե այն ամենը, ինչ ներկայացվում է… այս հարաբերությունները ոչ թե զրպարտության, պատվի և արժանապատվության պաշտպանության հարաբերություններ են, այլ հարաբերություններ են, որոնք ՀՀ իրավունքի պաշտպանության օրենսդրության մեջ կան»,-ոստիկանապետի հրաժարականի պահանջի, զրպարտության հնարավոր հայցի մասին ասաց Զեյնալյանը՝ հավելելով, որ այս ընտրությունները նախորդից տարբերվում են նրանով, որ անցնում են առանց ընտրակաշառքի, վարչական լծակների ու վարչական ռեսուրսների կիրառման:

Արտակ Զեյնալյանն ընդգծեց, որ շարունակում է պնդել՝ ինքը կընտրվի Երևանի քաղաքապետ։

Հնարավոր կոալիցիայի մասին հարցին Զեյնալյանը պատասխանեց՝ որևէ մեկին թշնամի չի համարում, քաղաքական տարբերություններ պետք է լինեն, պետք է լինի քննադատական խոսք, բայց դա չպետք է լինի թշնամություն ինչպես առաջ էր. «Մենք փակել ենք այդ էջը»,- եզրափակեց քաղաքապետի «Լույս» դաշինքի թեկնածուն։