Այդպիսի մարդիկ պիտի ամաչեն փողոց դուրս գալ. Դավիթ Բաբայանը՝ ՀԱԿ անդամի հայտարարության մասին. News.am

Հայ ազգային կոնգրեսի ներկայացուցիչ Զոյա Թադևոսյանի հայտարարությունը ոչ այլ ինչ է, եթե ոչ ազգային շահերին քաղաքական դավաճանություն: Այս մասին NEWS.am-ի հետ զրույցում ասել է Արցախի նախագահի մամուլի քարտուղար Դավիթ Բաբայանը:

«Ոմանք հրաշալի են խոսում հայերեն, բայց արդյոք նրանք հայերե՞ն են մտածում: Նշված տիկնոջը լսելով՝ տպավորություն է ստեղծվում, որ մեր առջև ոչ թե հայկական կուսակցության ներկայացուցիչ է, այլ Ադրբեջանի նախագահի աշխատակազմի: Զարմանալի է, որ հասարակության մեջ մարդիկ կան, որոնք նման կարծիք են հայտնում: Սա սարսափելի է: Սա ազգային շահերին քաղաքական դավաճանություն է, բարոյական դեգրադացիայի դրսևորում»,- նշել է Դավիթ Բաբայանը:

Բաբայանը նաև նշել է, որ իմանալով, թե ինչով է սպառնում Արցախի անվտանգության համակարգի թուլացումը՝ ոչ միայն հանրապետության, այլև Հայաստանի և ամբողջ հայության համար անթույլատրելի է նման հայտարարություններ անելը: Մնում է միայն հույս ունենալ, որ այդ հայտարարության հեղինակի գլխի հետ մի բան այնպես չէ:

«Ադրբեջանն, ըստ էության, իրեն ավելի ազնիվ է պահում՝ բացահայտ հայտարարելով Արցախը ոչնչացնելու մտադրության մասին, իսկ նման անձանց հայտարարությունները արդարացում չունեն: Այդպիսի մարդիկ պիտի ամաչեն փողոց դուրս գալ»,-ասել է Դավիթ Բաբայանը:

Հիշեցնենք, որ Զոյա Թադևոսյանը հուլիսի 31-ին մամուլի ասուլիսում ասել էր, որ գործ ունենք թեչ թե ազատագրած այլ զավթած տարածքների հետ, որոնք պետք է հետ վերադարձվե Ադրբեջանին: