«Պարզ է, թե ով է լինելու մեր վարչապետի թեկնածուն». ՀՀԿ-ն միաձայն կողմ է Սերժ Սարգսյանին վարչապետ առաջադրելուն

Հայաստանի հանրապետական կուսակցությունը շաբաթ օրը կուսակցության խորհրդին է առաջարկելու ՀՀ վարչապետի պաշտոնում առաջադրել կուսակցության ղեկավար Սերժ Սարգսյանի թեկնածությունը: Այս մասին ՀՀԿ ԳՄ նիստից հետո լրագրողների հետ ճեպազրույցում ասաց կուսակցության խոսնակ Էդուարդ Շարմազանովը:

«ՀՀԿ ԳՄ-ն սկսեց քննարկումները ապագա վարչապետի հետ կապված: Քննարկումները գնացին միասնության, համերաշխության մթնոլորտում: Բոլորն ընդունեցին այն առաջարկը, որն արվել էր ՀՀ վարչապետի պաշտոնակատար Կարեն Կարապետյանի կողմից նախօրեին, և մենք որպես Գործադիր մարմին, ՀՀԿ խորհրդի նիստին շաբաթ օրը կներկայացնենք վարչապետի թեկնածուին: Պարզ է, թե ով է լինելու մեր վարչապետի թեկնածուն՝ կուսակցության ղեկավար Սերժ Սարգսյանը: Այլ թեկնածուի անուն չի էլ հնչել»,- ասաց նա:

Էդուարդ Շարմազանովն ասաց, որ ՀՀԿ գործադիր մարմնի անդամներն ամփոփել են նախագահ Սերժ Սարգսյանի 10 տարիների կառավարման արդյունքները: «Այդ 10 տարիները եղել են բարդ, մարտահրավերներով լի, բայց միևնույն ժամանակ պետականության, անվտանգության ամրապնդման տարիներ: Դժվար է գերագնահատել պարոն նախագահի ներդրումը, Հայաստանի ամրապնդման գործում»,- ասաց ՀՀԿ խոսնակը: