Մենք պատրաստության մեջ ենք, թշնամին էլ է պատրաստության մեջ, ընդ որում՝ շատ ծանր կերպով. Բագրատ սրբազան

Բագրատ Սրբազանը ժամանեց Սուրբ Աննա եկեղեցու բակ, որտեղ նախատեսված է «Սրբազան պայքար»-ի հերթական հավաքը։ Մինչ հավաքի մեկնարկը Սրբազանը պատասխանեց լրագրողների հարցերին։ Մասնավորապես, Բագրատ Սրբազանից լրագրողները հետաքրքրվեցին, թե արդյո՞ք պատրաստվում է կուսակցություն հիմնել։

«Այս պահին նման  որևէ ծրագիր չկա և չեմ էլ կարծում, որ առաջիկայում լինելու է, որովհետև այս պայքարը կամ շարժումն ընդդիմադիր շարժում չէ, ոչ էլ՝ ընդդիմության։ Այս պայքարը հանուն Հայաստանի հանրապետության, մեր կյանքի վերականգնման, արժեքների և քաղաքակրթական փոփոխության  համար է»,- ասաց Սրբազանը։

Անդրադառնալով սեպտեմբերին սպասվող հավաքին, Բագրատ Սրբազանն ասաց․ «2026թ․-ի ընտրությունը չի ձգվի։ Ոչ ոք տրամադրություն չունի որևէ ձևով ձգձգումներ անելու։ Ընթացքն ինքն իրենով գնում է։ Մենք պատրաստության մեջ ենք, թշնամին էլ է պատրաստության մեջ, ընդ որում՝ շատ ծանր կերպով  թե՛ հոգևբարոյական, թե՛ ֆիզիկական  մակարդակում»։

Սրբազանը հստակեցրեց, որ թշնամի ասելով նկատի ունի ՀՀ գործող իշխանություններին։