Հորդանանն ԱՄՆ-ից, Իսրայելից և Իրանից պահանջել է հեռու մնալ իր օդային տարածությունից

Հորդանանի փոխվարչապետ և արտաքին գործերի նախարար Այման աս Սաֆադին Իրանին նախազգուշացրել է, որ թագավորությունը թույլ չի տա իր օդային տարածքն օգտագործել Իսրայելին հարվածներ հասցնելու համար՝ ի պատասխան Թեհրանում ՀԱՄԱՍ-ի քաղաքական բյուրոյի ղեկավար Իսմայիլ Հանիյեի սպանության։ Այս մասին հաղորդում են տարբեր ԶԼՄ-ներ՝ վկայակոչելով Sky News Arabia-ին։ 

«Թագավորության ԱԳՆ ղեկավարն ԱՄՆ-ից, Իսրայելից և Իրանից պահանջել է հեռու մնալ Հորդանանի օդային տարածությունից», – մեջբերում է հեռուստաալիքն աղբյուրի խոսքը։

Ըստ Kan News-ի՝ նմանատիպ հայտարարություն է արել նաև Սաուդյան Արաբիան՝ նշելով, որ թույլ չի տա, որ իրանական հրթիռները և անօդաչու թռչող սարքերն անցնեն իր տարածքով դեպի Իսրայել։ Ըստ Սաուդյան Արաբիայի թագավորական ընտանիքի բարձրաստիճան պաշտոնյայի՝ այդ հայտարարությունն ուղարկվել է նաև անմիջապես Իրանին։ Ապրիլի 13-ի լույս 14-ի գիշերը Հորդանանի ռազմաօդային ուժերը և հակաօդային պաշտպանությունը խոցել են ԱԹՍ-ներ և հրթիռներ, որոնք արձակվել էին Իրանից՝ ի պատասխան Դամասկոսում Իսլամական հեղափոխության պահապանների կորպուսի մի քանի գեներալների սպանության:

Փոխվարչապետն այն ժամանակ հայտարարել էր, որ Հորդանանը «կխոցի ցանկացած անօդաչու թռչող սարք կամ հրթիռ, որոնք կթափանցեն իր օդային տարածք»՝ անկախ նրանից՝ դրանք իրանական են թե իսրայելական։