Ալիևը նոր պահանջներ է դնում, Փաշինյանը՝ խոսում էական փոփոխության մասին

Երեկ՝ մայիսի 28-ին, Իլհամ Ալիևը կնոջ հետ մեկնել է օկուպացված Իվանյան (Խոջալու): Նրանք հանդիպել են Խոջալու քաղաքում վերաբնակեցվածների հետ։

Իր ելույթում՝ խոսելով այսպես ասած «Խոջալուի ցեղապասնությունից», Ադրբեջանի նախագահը մասնավորապես նշել է․

«Ամբողջ աշխարհը կտեսնի, թե ինչ է հայկական բարբարոսությունը։ Հայաստանն ինքը պետք է ընդունի դա, ինքը պետք է ներողություն խնդրի մեզանից։ Միայն այդ կերպ Հայաստանի ներկայիս ղեկավարությունը կարող է գոնե մի փոքր լվանալ այդ վայրենիների, վանդալների ու արյունոտ մարդկանց մեղքերը։ Եթե դա չանի, ապա, կարծում եմ, Հայաստանը երբեք չի կարողանալու ոտքի կանգնել։ Նախ, Հայաստանն ինքը պետք է ճանաչի այդ ողբերգությունը, դա հանցագործություն է, պատերազմական հանցագործություն»։

Նիկոլ Փաշինյանն Ալիևի այս հայտարարությանը չանդրադարձավ, փոխարենը այսօր՝ մայիսի 29-ին, ճեպազրույցում հայտարարեց․ «Հիմա մենք ունենք մթնոլորտի էական փոփոխություն, բայց դա դեռ չի նշանակում, որ հասել ենք վերջնագծին և մնում է խաղաղության պայմանագրի ստորագրելը»։

«Ամեն օրն էլ հրաշալի հնարավորություն է խաղաղության պայմանագրի ստորագրման։ Խնդիրն այն է, որ խաղաղության պայմանագրի տեքստի շուրջ պետք է ձեռք բերվեն համաձայնություններ, և ես հույս ունեմ, որ ձեռք կբերվեն, ավելի ճիշտ այդ համաձայնությունները ձեռք բերված են»,- ասաց Փաշինյանը։

Ստացվում է՝ Ալիևը նորանոր մտացածին ելույթներ է ունենում ու պահանջներ դնում, իսկ Փաշինյանն այդ ամենը համարում է դրական փոփոխություն։