«Nə oldu Pashinyan» երգ չկա՞, կա, Ալիևը չի՞ ծաղրում Փաշինյանին՝ ծաղրում է, Ալիևը չի ասե՞լ հարբեցող ծաղրածու՝ ասել է․ Սրբազան

Ես քո ցերեկով անցած ճանփեքը գիշերով եմ անցել, դու հիմա ճիշտ չես ասում: Այս մասին, հայրենադարձների հետ հանդիպումից հետո ասաց Տավուշի թեմի առաջնորդ Բագրատ Սրբազանը՝ դիմելով Civic.am-ի լրագրողին։

Նա նշեց, որ ԵՊՀ պրոռեկտորի հետ կապված դեպքում ինքը միայն փոխանցել է տեղեկատվությունը և նշել, որ սա չստուգված տեղեկություն է. «Ես ասել եմ՝ վաղն էլ գալում եմ ստուգեմ տեղեկությունը: Մարդուն ոչ հայհոյել եմ, ոչ վիրավորել: Գնացել եմ, մարդը հերքել է, ես դրանից հետո չեմ շարունակել: Ես ասել եմ՝ եթե որևէ կերպով դուք վիրավորվել եք, ես ամոթ չեմ զգում ներողություն խնդրելու»,-ասաց նա:

Անդրադառնալով իր մյուս հայտարարությանը, թե Ալիևը Շուշի է մեկնում մեքենայում միացրած «Նոլդու Փաշինյան» երգը, որը պարզվեց կեղծ է, Սրբազանն ասաց. «Եղել է տեսանյութ, հետո պարզվել է՝ կեղծ է, այդ պատճառով ես ընդունել եմ, որ դա սխալ է եղել»:

Հարցին՝ ո՞վ է ձեզ նման սխալ բաներ զեկուցում և տրամադրում, Բագրատ Սրբազանը պատասխանեց. «Ես կարող էի հետդ չխոսել, որովհետև դուք ստախոսության խողովակ եք։ Այն, ինչ դուք գրում եք, դրա համար դեռ պետք է շատ պատասխան տաք: Մեր երկրում անպատասխանատու խոսք չպետք է լինի:

Ալիևի տեսանյութի հետ կապված ընդունել եմ, որ որոշակի սխալ տեղեկություն է եղել: Այդտեղ ոչ մի հանցանք չկա, չէ: Երանի բոլորն այդպես վարվեին, բայց «Noldu Pashinyan» երգ չկա՞, կա, Ալիևը որտեղ նստում է, չի՞ ծաղրում Փաշինյանին՝ ծաղրում է, Ալիևը չի ասե՞լ հարբեցող ծաղրածու՝ ասել է: Չի՞ ասել, որ կոլխոզ էլ չի վստահի՝ ասել է։ Երբ որևէ երկրի ղեկավար որևէ երկրի ղեկավարի վիրավորում է ու ծաղրում, դա միայն այդ երկրի ղեկավարի հարցը չի՝ ամբողջ ժողովրդի պատկերն է: Ցանկալի կլիներ, որ ինձ վարկաբեկելու, վիրավորելու փոխարեն թե խորհրդարանից, թե տարբեր լրատվամիջոցներից հայացքներդ այն կողմ ուղղեիք»,- նշել է Սրբազանը։