«Ազատություն ռադիոն» Ռուսաստանում համարվել է անցանկալի կազմակերպություն

ՌԴ արդարադատության նախարարությունը «Ազատություն ռադիո Եվրոպա/Ազատություն ռադիո» կորպորացիան մտցրել է անցանկալի կազմակերպությունների ցուցակում։ Ինչպես վկայում են գերատեսչության կայքի տվյալները, այսպիսի որոշում գլխավոր դատաախզությունն ընդունել էր դեռեւս փետրվարի 2-ին։

Օտարերկրյա գործակալների ցուցակում «Ազատությունը» մտցվել է 2017-ից։ Այդ ժամանակվանից ԶԼՄ-ն բազմիցս տուգանվել է, հիմնականում «օտարերկրյա գործակալ» մակնիշավորման բացակայության պատճառով։

«Ազատություն ռադիոյին» ընդհանուր առմամբ ներկայացվել է 1 մլրդ ռուբլին գերազանցող տուգանք։

2023թ. հոկտեմբերին Կազանում բռնել են «Ազատություն ռադիոյի» թաթարա-բաշկիրական ծառայության խմբագիր Ալսու Կուրմաշեւային։ Ավելի ուշ Կազանի դատարանը ձերբակալել է նրան «օտարերկրյա գործակալ» գրվելու պարտականությունից խուսափելու համար։ Իսկ դեկտեմբերին հայտնի է դարձել, որ նրա դեմ հարուցվել է նոր քրեական գործ «Ոչ պատերազմին» գրքի համար։ Ռուսական բանակի մասին «քաղաքական ատելության մոտիվներով ֆեյքերի» տարածման գործով նրան սպառնում է 10 տարվա ազատազրկում։

«Ազատություն ռադիո Եվրոպա/Ազատություն ռադիոն» միջազգային մեդիա-կորպորացիա է, որն ամեն տարի դրամաշնորհներ է ստանում ԱՄՆ Կոնգրեսից, ամերիկյան օրենքները պաշտպանում են նրա անկախությունը։

Կորպորացիայի կառուցվածքի մեջ են մտնում տարածաշրջանային բազմաթիվ ծառայություններ տարբեր լեզուներով, այդ թվում «Настоящее время» հեռուստաալիքը։

«ԶԼՄ-ների իրավունքների պաշտպանության հիմնադրամ» կենտրոնը (օտարերկրյա գործակալների ցուցակում է) նշել է, որ առաջին դեպքն է, երբ «անցանկալի» կազմակերպությունների ցուցակ է մտցվել մեդիա-կորպորացիա, որն ասոցիացվում է օտարերկրյա պետության հետ։