Հեռացնել երևանցիների առողջության ու գրպանի վրա թանկ նստած պսևդոքաղաքապետին. «Ազգային առաջընթաց»

Երևանի ավագանու «Ազգային առաջընթաց» խմբակցությունը հայտարարություն է տարածել.

« «Քաղաքացիական պայմանագիր» կուսակցությունը, իր կցորդների հետ միասին, որոշել է Երևանի ավագանուց հեռացնել ամենամեծ ընդդիմադիր խմբակցության՝ «Ազգային առաջընթաց»-ի լիդեր Հայկ Մարությանին և ավագանու ընդդիմադիր մի շարք այլ անդամների։

Իրավական և քաղաքական առումով թերի այս գործողությունը բացառապես մեկ նպատակ է հետապնդում՝ լռեցնել ընդդիմության ձայնը և զրկել նրան կոռումպացված ու ապաշնորհ քաղաքային իշխանության վնասաբեր որոշումների դեմ պայքարելու հնարավորությունից։

Քաղաքական դիրքորոշում արտահայտելու՝ ընդդիմադիրների իրավունքը ժողովրդավարության կարևորագույն սկզբունքներից է և տեղական ինքնակառավարման հիմնասյուներից։ Իշխող փոքրամասնությունն այս կամայական գործելաոճով արհամարում է մեր ուժին ձայն տված յուրաքանչյուր երևանցու քվեն։

Ժամանակն ապացուցեց, որ օրվա իշխանությունը թքած ունի իր հռչակած հեղափոխական արժեքների վրա և առաջնորդվում է բացառապես նեղ խմբակային շահերով։ Միակ հարցը, որ իմաստ ունի քննարկել այս իշխանության հետ, մեկն է՝ հեռացնել երևանցիների առողջության ու գրպանի վրա արդեն իսկ չափազանց թանկ նստած պսևդոքաղաքապետին»։

Նշենք, որ փետրվարի 5-ին կգումարվի արտահերթ նիստ, որի ընթացքում կքննարկվի 5 ավագանու անդամների մանդատից զրկելու հարցը:

Թեմային հրատապ ճեպազրույցով անդրադարձել էր նաև «Մայր Հայաստան» դաշինի ղեկավար Անդրանիկ Թևանյանը՝ խոսելով ընդդիմադիրների դեմ սկսված քաղաքական արշավի մասին և տեղեկացնելով, որ իրենց խմբակցությունը պատրաստվում է մասնակցել նիստին: