Հայաստանը լուռ մնաց Իրանում տեղի ունեցած և՛ երկրաշարժին, և՛ այդ երկրի դեմ ագրեսիվ գործողություններին․ Գեղամ Մանուկյան

«Այն քայլերով, այն ձևով, որով Արարատ Միրզոյանը հրաժարվեց մասնակցել Մոսկվայում Ռուսաստանի և Ադրբեջանի ԱԳ նախարարների հետ հանդիպմանը, առանց պաշտոնական խողովակներով տեղեկացնելու, արդեն ինքնին խայտառակություն է»,-այս մասին, Աժ-ում, լրագրողների հետ զրույցում ասաց «Հայաստան» խմբակցության պատգամավոր Գեղամ Մանուկյանը։  

 «Այս լարված, պրկված պահին ՀՀ իշխանությունը շատ ավելի զգուշավոր պետք է գործեր, չվնասեր այլ երկրների, հատկապես ռազմավարական դաշնակցի հետ իր հարաբերություններին, որը մենք տեսնում ենք, որ լրիվ հակառակ ընթացքն է ստանում: Պարբերաբար, ցիկլերով, նաեւ իշխանության կոճակ սեղմելով, իշխանական պատգամավորներ, իշխանական քարոզչամեքենաներ սկսում են հուժկու հակառուսական արշավ,  հետո թուլացնում են, հետո նոր աշավ է բարձրանում, որ ինքնին  ցույց է տալիս, թե որքան մատների արանքով են նրանք նայում արտաքին հարաբերություններին, ռազմավարական գործընկերների հետ հարաբերություններին»;

Գեղամ Մանուկյանը նաև նկատեց, որ պաշտոնական բարձր մակարդակով Հայաստանը լուռ մնաց նաև հարևան Իրանում տեղի ունեցած ագրեսիվ գործողությունների նկատմամբ, որոնք լարվածություն բերեցին տարածաշրջան։