Հայկական կողմի կորուստները զգալիորեն պակաս են 2 000-ից. Արծրուն Հովհաննիսյան

Հայկական կողմի կորուստները զգալիորեն պակաս են երկու հազարից։ Այս մասին «5-րդ ալիք»-ի եթերում ասել է ՀՀ ՊՆ ներկայացուցիչ Արծրուն Հովհաննիսյանը։

«Հայտարարվել է պաշտոնապես 927 զոհ։ Հաստատ մեր հայտնած այդ տվյալի կրկնապատիկը չէ մեր զոհերի քանակը։ Մեր կորուստները զգալիորեն պակաս են 2000-ից (ինչի մասին խոսել էր ՌԴ նախագահը՝ խմբ.)», - ասել է նա՝ հավելելով, որ վերջնական թիվ այժմ ասել չեն կարող, որովհետև կան անհայտ կորածներ և չիդենտիֆիկացված զոհեր։

Սու-30 կործանիչները իրենց նշանակության և մարտական հնարավորությունների սահմանափակ ծավալով կիրառվում են։

«Չբացեմ փակագծերը՝ որտեղ, ինչի համար, ինչպես։ Սու 30-ններն ունեն բազում ֆունկցիաներ։ Կործանիչ ավիացիան ունի բազում ֆունկցիաներ. և հարվածային, և պաշտպանողական, և պատսպարման, և հետախուզական, և ռադիոլեկտրոնային։ Դա բարդ զինատեսակ է, որն ունի ադապտացման և յուրացման տևական փուլ», - նշեց ՊՆ ներկայացուցիչը։

Արծրուն Հովհաննիսյանի խոսքով՝ յուրացման փուլը պրոցեսի մեջ է հայ մասնագետների կողմից։

«Մենք չենք ավարտել Սու-30-ի լիարժեք մարտական կիրառության հնարավորությունների ամբողջ բացազատումը։ Դա տևական գործընթաց է։ Սու-30-ը՝ աշխարհի բարդագույն կործանիչներից մեկն է՝ 4++ սերնդի, որն ունի ահռելի մարտական պոտենցիալ, բայց դրա փորձի պետք է ունենաս», - նշել է նա։