Դատարանը չպետք է Վարդենիսի ավագանու ՔՊ անդամների դիմումը վարույթ ընդուներ. Վարազդատ Հարությունյան

Վարդենիսի ավագանու «Քաղաքացիական պայմանագիր» խմբակցության անդամների՝ ընդդիմադիր համայնքապետ Ահարոն Խաչատրյանի ընտրության արդյունքները վիճարկող հայցադիմումը վարույթ ընդունելն իսկ կոնկրետ հետևանքներ է ունեցել: Այս մասին լրագրողների հետ զրույցում ասաց Վարդենիս խոշորացված համայնքի ավագանու ընդդիմադիր՝ «Միասնական Վարդենիս» և «Ահարոն Խաչատրյան» խմբակցությունների շահերը ներկայացնող փաստաբան Վարազդատ Հարությունյանը:

Նշենք, որ ՀՀ վարչական դատարանում քննվում է Ահարոն Խաչատրյանին Վարդենիս համայնքի ղեկավար ընտրելու արդյունքն անվավեր ճանաչելու՝ «Քաղաքացիական պայմանագիր» խմբակցության բողոքը։ «Մեր պնդմամբ՝ իրավաբանական հետևանքն այն է, որ վարչական ակտի գործողությունը չի կասեցվում, ուրեմն ինչ-որ մարդկանց կարծիքով էլ կասեցվում է, դրա համար կնիքն ու բանալիները չեն տալիս։ Իրենց թվում է, որ այս դատական գործը հաղթելու են և էլ իմաստ չկա կնիքն ու բանալիները տալու»,-ասաց փաստաբանը։