Վահրամ Բաղդասարյանին կալանավորելու միջնորդություն է ներկայացվել, նիստը հետաձգվել է

ՀՀԿ նախկին պատգամավոր Վահրամ Բաղդասարյանի պաշտպան Վահագն Գասպարյանը լրագրողների հետ զրույցում հայտնեց, որ կալանավորման միջնորդություն են ներկայացրել, նիստը հետաձգվել է:

Նա նշեց՝ ԱԱԾ հրապարակած ձայնագրություններում խոսվում է հավաքների մասին։

«Եթե հավաքներին մասնակցելը կամ կազմակերպելը իշխանության յուրացում է, իշխանության ներկայացուցչին սպանել նախապատրաստել է՝ ես բան չունեմ ասելու, իրավաբանության մեջ նման հիմնավորում գոյություն չունի: Նախապատրաստումը իրենից ենթադրում է կոնկրետ անձի գործողություններ, մեզ համար պարզ չի՝ Բաղդասարյանն ինչ է կատարել: Եթե ուշադիր լինեք ձայնագրությանը, հատուկ կպցրած են իրար, որ փորձեն անմիջական կապ հաստատել», - ասաց նա:

Փաստաբանը նաև նշեց, որ Բաղդասարյանին ձերբակալել են զենք-զինամթերք ձեռք բերելու ու պահելու համար:

«Բաղդասարյանի տանը խուզարկություն են կատարել, նրա տանը 2011թ. ծննդյանը նվեր ստացած օրինական զենքն է, և ձերբակալվել է դրա համար: Ներկա պահին այդ մասը մեղադրանքից հանվել է», - ասաց փաստաբանը՝ ավելացնելով, որ Բաղդասարյանին բերման ենթարկելն ու ձերբակալելը, մեղմ ասած, ոչ իրավաչափ է: