ԱԺ-ում հրատապ քննարկվող ՔՕ փոփոխությունն անիմաստ է․ Արսեն Բաբայան

Իրավապաշտպան Արսեն Բաբայանը ֆեյսբուքյան իր էջում գրել է․

«Կարծում եմ ԱԺ նիստում այս պահին հրատապ քննարկվող քրեական օրենսգրքի փոփոխությունն անիմաստ է, քանի որ լուծման առաջարկվող հարցը վաղուց լուծված է գործող քրեական օրենսգրքի 123-րդ հոդվածով, այն է՝

1. Այլ անձին մարդու իմունային անբավարարության վիրուսի հարուցիչով վարակելու ակնհայտ վտանգի ենթարկելը՝

պատժվում է տուգանքով՝ նվազագույն աշխատավարձի հարյուրապատիկից երկուհարյուրհիսնապատիկի չափով, կամ կալանքով՝ առավելագույնը երկու ամիս ժամկետով, կամ ազատազրկմամբ՝ առավելագույնը մեկ տարի ժամկետով:

2. Այլ անձին մարդու իմունային անբավարարության վիրուսի հարուցիչով դիտավորությամբ կամ ինքնավստահությամբ վարակելն այն անձի կողմից, ով գիտեր իր մոտ այդ հիվանդության առկայության մասին՝

պատժվում է ազատազրկմամբ՝ առավելագույնը հինգ տարի ժամկետով:

3. Սույն հոդվածի երկրորդ մասով նախատեսված արարքը, որը կատարվել է՝

1) երկու կամ ավելի անձանց նկատմամբ,

2) անչափահասի նկատմամբ,

3) ակնհայտ հղի կնոջ նկատմամբ՝

պատժվում է ազատազրկմամբ՝ երեքից ութ տարի ժամկետով:

Թարմացում. հավանաբար տարբերությունը կլինի «իմունային»-ի մասով, որը բժիշկներն ավելի ճիշտ կասեն, բայց նույնիսկ այդ տարբերության դեպքում պարզապես պետք էր այս հոդվածը փոփոխել»։