Ամուլսարի գործով քրեական հետապնդման հիմքեր չկան. քննչական խմբի ղեկավար

Ամուլսարի ոսկեբեր քվարցիտների հանքավայրի շահագործման հետ կապված համալիր փորձաքննության արդյունքները արդյունքները ցույց են տվել, որ ծրագրի տարածքի և Ջերմուկի տերմալ տաք աղբյուրների միջև ստորգետնյա ջրերի հոսքի և աղտոտման փոխանցման ուղիներ առկա չեն:

Ըստ փորձաքննության՝ Ամուլսարի տարածքի մոտ գտնվող Արփա, Դարբ և Որոտան գետերի վրա ազդեցությունն անորոշ է, քանի որ քանակական առումով այդ ազդեցությունները չափելի չեն։

ՔԿ Կոռուպցիոն, սեփականության դեմ ուղղված հանցագործությունների և կիբեռհանցագործությունների քննության վարչության պետ Յուրա Իվանյանը լրագրողների հետ զրույցում նշեց, որ եզրակացության ստացումից հետո ՔԿ-ն որոշել է, ՀՀ Քրեական օրենսգրքի 282-րդ հոդվածի 1-ի մասի հատկանիշներով հարուցված քրեական գործով քրեական հետապնդման հիմքեր չկան, վարույթը չի կարճվել։

 Յուրա Իվանյանը նշեց, որ «Լիդիան Արմենիա» ընկերությունը պատասխանատվություն է ստանձնել, որ հանքի տարածքից որևէ աղտոտված ջուր դուրս չի գալու։

 Հանքի շահագործման թույլտվության թեմային անդրադառնալով՝ ՔԿ պաշտոնյան նշեց, որ դա նախատեսված է օրենսդրությամբ, և իրավասու մարմիններն են այդ հարցը լուծելու:

Հիշեցնենք, որ ՔԿ-ն հրապարակել է Ամուլսարի փորձաքննության վերջնական եզրակացությունը։