Մարդն ունի առցանց հարթակում անանուն մնալու միջազգային իրավունք. Արման Թաթոյան

ՀՀ մարդու իրավունքների պաշտպան Արման Թաթոյանը, լրագրողների հետ զրույցում անդրադառնալով  ֆեյքերի դեմ պայքարին, նշեց, որ  անանուն մնալը մարդու իրավունքներից մեկն է, և կան նույնիսկ մշակված միջազգային չափանիշներ ու ուղեցույցներ առցանց անանուն մնալու մշակույթի մասին։

«Այս հարցն անմիջականորեն գտնվում է մեր ուշադրության ներքո: Ատելության խոսքը, բռնության կոչերը, վիրավորանքը, սպառնալիքը հիմնականում տարածում են ֆեյք օգտատերերը: Երբ մեզ դիմում են, մենք դրանք ուղարկում ենք ոստիկանություն կամ դատախազություն` քրեական հետապնդում նախաձեռնելու առաջարկով: Բայց դա էլ արդյունավետ չի աշխատում, քանի որ «Ֆեյսբուք» սոցիալական ցանցում հայտնաբերելու մեխանիզմներն էլ արդյունք չեն տալիս»,- նշեց նա:

Անդրադառնալով վարչապետի հանձնարարականին՝ ՄԻՊ-ն ասաց, որ ԱԱԾ-ի պես փակ կառույցը նման հարցում լայնորեն ներգրավելը կարող է նաև խնդիրներ հարուցել խոսքի ազատության ոլորտում:

«Յուրաքանչյուր մարմին պետք է զբաղվի ըստ իրավասության: Նշեցի, որ մենք աշխատում ենք ոստիկանության հետ, դատախազության հետ»,- ասաց նա՝ հավելելով, որ խոսքի ազատությունը պետք է ամուր պաշտպանված լինի, և մարդն ունի առցանց հարթակում անանուն մնալու միջազգային իրավունք։