Իրավական զավեշտ․ ամենաբարձր վարկանիշ ունեցողին «աշխատանքից ազատեց» զրոյից ցածր վարկանիշ ունեցողը

Բարձրագույն դատական խորհորդը՝ Կարեն Անդրեասյանի ղեկավարությամբ, երեկ՝ հուլիսի 3-ին, դադարեցրեց 4 դատավորի, այդ թվում՝ Դավիթ Հարությունյանի լիազորությունները։

Հիշեցնենք, որ Դավիթ Հարությունյանին անգամ հեռացրել էին ԲԴԽ նիստերի դահլիճից և իր բացակայությամբ անցկացրել նիստը։

Որքանով է օրինական ԲԴԽ որոշումը և որքանով է արդարացի ԲԴԽ յուրաքանչյուր անդամի կցվածք, թողնում ենք մասնագետներին։

Մենք կանդրադառնանք զավեշտին, որը երևում է հենց դատավորների վարկանիշի գնահատման կայքում։

Կայքի գլխավոր լուսանկարում լիազորությունները դադարեցված դատավոր Դավիթ Հարությունյանն է և ԲԴԽ նախագահ Կարեն Անդրեասյանը։ Դավիթ Հարությունյանն այս պահին ունի ամենաբարձր վարկանիշը՝ 89, Կարեն Անդրեասյանը՝ մենացածր վարկանիշը՝ -33։

Ստացվում է՝ ամենացածր վարկանիշ ունեցող դատավորն իրավունք է ստացել «գործից հանել» դատավորներին․ նա էլ առաջին հերթին ազատվում է բարձր վարկանիշ ունեցողներից։

Ուշագրավ է նաև այն, որ ամենացածր վարկանիշ ունեցող 5 դատավորից 4-ը ԲԴԽ անդամ են․ Կարեն Անդրեասյանին զիջում են Հայկ Գրիգորյանը՝-14, Վիգեն Քոչարյանը և Երանուհի Թումանյանցը՝ -9 վարկանշով։ Նրանք իրենց վարկանշով հավասար են դատական համակարգում «մատնացույց» արվող Արմեն Դանիելյանին։