Դե´, պարոն Դավթյան, դուխով

2018թ. դեկտեմբերի 6-ին Yerevan.today-ում հրապարակված «Տաս տարի անց կամ Փաշինյանի «թավշյա» ռեցիդիվը» հոդվածիս «Դե´, պարոն Դավթյան, դուխով» մասում ՀՀ գլխավոր դատախազի ուշադրությունն եմ հրավիրել այն փաստի վրա, որ 2018թ. ապրիլ-մայիս ամիսների ընթացքում ՀՀ ԱԺ պատգամավոր Նիկոլ Փաշինյանն ու նրա գլխավորած խումբը տապալել են սահմանադրական կարգը և յուրացրել իշխանությունը: Դա, ըստ էության, հաղորդում էր՝ կատարված հանցագործության մասին (ՀՀ քր. դատ. օրենսգրքի 179-րդ հոդվածի 1-ին կետում ամրագրված է. «լրատվության միջոցների հաղորդումներ են հանդիսանում կատարված կամ նախատեսվող հանցագործությունների մասին հաղորդումները մամուլում, ռադիոյով, հեռուստատեսությամբ, ինչպես նաև լրատվության միջոցներին հասցեագրված և չհրապարակված հաղորդակցություններում»): Ըստ այդմ, ՀՀ գլխավոր դատախազության ուղղակի պարտականություններն են (ՀՀ քր. դատ. օրենսգիրք, 27-րդ հոդված) անհապաղ քննարկել և լուծել այդ հաղորդումը, ինչը օրենքի ուղղակի պահանջն է. «Հանցագործության մասին հաղորդումները պետք է քննարկվեն և լուծվեն անհապաղ, իսկ գործ հարուցելու առիթի օրինականությունը և հիմքերի բավարար լինելն ստուգելու անհրաժեշտության դեպքում` դրանց ստացման պահից 10 օրվա ընթացքում» (ՀՀ քր. դատ. օրենսգիրք, 180-րդ հոդված, 1-ին կետ):

Եվ` «Հանցագործության մասին տեղեկություն ստանալու յուրաքանչյուր դեպքում ընդունվում է որոշումներից մեկը` 1) քրեական գործ հարուցելու մասին, 2) քրեական գործ հարուցելը մերժելու մասին, 3) հաղորդումն ըստ ենթակայության հանձնելու մասին» (ՀՀ քր. դատ. օրենսգիրք, 181-րդ հոդված):

Սակայն, առ այսօր, ՀՀ գլխավոր դատախազությունը չի անդրադարձել այդ հաղորդմանը, պահպանում է քար լռություն, ինչով կատարել է ՀՀ քր. օրենսգրքի 315-րդ հոդվածով նախատեսված արարք` պաշտոնեական անփութություն:

Հիանալ կարելի է միայն ՀՀ գլխավոր դատախազ Արթուր Դավթյանի խիզախությամբ, որը հանդգնել է չկատարել Վարչապետի կամքը և պատերին չի ծեփել հաղորդման մեջ նշված անձանց, անկախ նրանց անուն-ազգանունների և զբաղեցրած պաշտոններից, կամա թե ակամա ինքն իրեն դարձնելով ասֆալտին փռելու հումք:

Ես դիմում եմ ՀՀ գլխավոր դատախազ Արթուր Դավթյանին՝ հորդորով՝ անդրադառնալ Yerevan.today.am-ում 2018թ. դեկտեմբերի 6-ին հրապարակված իմ «Տաս տարի անց, կամ Փաշինյանի «թավշյա» ռեցիդիվը» հոդվածին, և, թող ների ինձ Ա. Դավթյանը, բայց ստիպված եմ դիմել դուզ խոսքով. պարոն Ա. Դավթյան, այս հոդվածը իրենից ներկայացնում է հանցագործության մասին հաղորդում (ՀՀ քր. դատ. օրենսգիրք 179 հոդված, 1-ին կետ): Հաղորդում, պարոն Դավթյան, որի առթիվ դուք պարտավոր եք իրականացնել օրենքով նախատեսված գործողություններ:

Մնում է ավելացնել միայն, որ այս անգամ դուք պետք է ձեռքի հետ անդրադառնաք նաև վերը նշված Ձեր կողմից թույլ տված պաշտոնեական անփութության դեպքին: Սա նույնպես հաղորդում է, պարոն Դավթյան, հաղորդում:

Այնպես որ, այս անգամ հարկադրված եք լինելու ոչ միայն ծեփել, այլ նաև ինքնածեփվել:

Դե´, պարոն Դավթյան, դուխո´վ...

Նախորդ՝ «Տաս տարի անց կամ Փաշինյանի «թավշյա» ռեցիդիվը» հոդվածը՝ այստեղ։ 

Վարդան Պետրոսյան

«Հայոց Տուն» կենտրոն

իրավապաշտպան