Նոր գումար ենք ներգրավում հին պարտքը փակելու համար. Նիկոլ Փաշինյան

ՀՀ վարչապետ Նիկոլ Փաշինյանը ֆեյսբուքյան ուղիղ եթերում անդրադարձավ եվրոբոնդերի թեմային՝ հիշեցնելով, որ 2013թ․-ին ՀՀ կառավարությունը 500 մլն դոլարի եվրոբոնդեր՝ արժեթղթեր էր թողարկել՝ 6,25% եկամտաբերությամբ։

«Այն 7 տարի մարման ժամկետով էր, ստացվել էր այնպես, որ այսինքն՝ 500 մլն դոլար պետք է վճարեինք 2020 թ․-ին կանխիկ, որպեսզի այդ գումարը փակեինք: Մենք որոշեցինք գնալ ուրիշ ճանապարհով, և պարտքի և գնման գործողություն իրականացնել, եթե շատ կոպիտ ասեմ, նոր գումար ներգրավենք հին պարտքը փակելու համար»,-նշեց վարչապետը` հավելելով, որ Հայաստանի նկատմամբ միջազգային տնտեսական հանրության վստահությունը շարունակում է աճել։

 «Նոր եվրոբոնդերը թողարկվել են աննախադեպ ցածր տոկոսներով՝ 4,20%-ով, այսինքն՝ 2 տոկոսով ցածր, ինչը նշանակում է՝ ՀՀ տնտեսության նկատմամբ վստահության ահռելի դրսևորում։ Ոչ թե մեր ունեցած գումարներից այդ 500 մլն-ը կփակենք, այլ նոր միջոցներ կներգրավենք»,-մեկնաբանեց վարչապետը՝ ասելով, որ այս գործողության արդյունքում ստացվել է, որ նոր պարտքը կվճարվի 2029թ․-ին՝ տարեկան խնայելով 10,2 մլն դոլար։

Նիկոլ Փաշինյանը նաև նշեց, որ երբ հայտարարում էր տնտեսական հեղափոխության մասին, նկատի ուներ նաև նմանատիպ երևույթները։