Կազանի դպրոցում հրաձգության հետևանքով զոհերի թիվը հասել է 11-ի

Կազանում ուսումնական հաստատությունում հրաձգության ժամանակ 11 մարդ է զոհվել, «ՌԻԱ Նովոստի»-ին հայտնել են տարածաշրջանային արտակարգ ծառայությունները: Ավելի վաղ հաղորդվում էր վեց, ապա՝ ինը զոհի մասին: Երկու աշակերտներ մահացել են՝ ցատկելով երրորդ հարկից:

Միաժամանակ, Թաթարստանի նախագահ Ռուստամ Միննիխանովը հայտարարել է յոթ մահացածների մասին` չորս տղա եւ երեք աղջիկ, բոլորը` ութերորդ դասարանի աշակերտներ: Նրա խոսքով՝ հոսպիտալացվել է 16 մարդ՝ տասներկու երեխա եւ չորս մեծահասակ:

Նախնական տվյալներով՝ կրակողները դեռահասներ են եղել, նրանցից մեկին ձերբակալել են, մյուսին՝ չեզոքացրել:

Տարհանված երեխաների հետ հոգեբաններ են աշխատում, կազմակերպվել է «թեժ գիծ»:

Դեպքի վայր է ուղարկվել շտապօգնության 21 մեքենա: Այնտեղ են մեկնել նաեւ Միննիխանովը, հանրապետության առողջապահության նախարար Մարատ Սադիկովը եւ շրջանի դատախազ Իլդուս Նաֆիկովը:

Հարուցվել է քրեական գործ: Շենքում շարունակվում են օպերատիվ գործողությունները:

Քաղաքում հակաահաբեկչական գործողության ռեժիմ է սահմանվել: Բոլոր ուսումնական հաստատություններում ուժեղացվել են անվտանգության միջոցառումները: