«Իմ քայլի» պատգամավորը ելք է գտել. Պետք չէ «կապիտուլյացիա» ասել, քանի որ թշնամին ամեն ինչ լսում է

Ելույթների ժամանակ պետք չէ օգտագործել «կապիտուլյացիա» տերմինը, քանի որ թշնամին կարող է լսել դա: Այս մասին նոյեմբերի 26-ին «Ռազմական դրության չեղարկման մասին» օրինագծի քննարկման ժամանակ հայտարարեց իշխող «Իմ քայլը» դաշինքի պատգամավոր Հովհաննես Իգիթյանը:

Հիշեցնենք, որ տեղի ունեցածի հետ կապված տերմինի հեղինակը Նիկոլ Փաշինյանն է: Իր լայվերից մեկի ժամանակ, ըստ լրատվամիջոցի, նա այս բառն օգտագործել է տասից ավելի անգամ:

Պատգամավորի խոսքով` Հայաստանի, Ադրբեջանի եւ Ռուսաստանի միջեւ կնքված պայմանագիրը դժվար է կապիտուլյացիա կոչել, քանի որ դա ընդամենը համաձայնագիր է եւ ոչ ավելին: Իրականում փաստաթուղթը կոչվում է «հայտարարություն», այլ ոչ թե համաձայնություն:

«Դա կապիտուլյացիա չէ, այլ` համաձայնություն: Այո, այն մեզ համար շատ վատն է, պարտադրված, անորոշ, բայց մեր հակառակորդն այդ անորոշությունն օգտագործում է ի շահ իրեն»,- ցավով նշեց Իգիթյանը` այնուամենայնիվ չպարզաբանելով, թե ինչպես կարելի է բնութագրել Ադրբեջանի կողմից Հայաստանին առաջադրված պայմանները, որոնց համաձայն Երեւանը պարտավոր է զիջել եւ Բաքվին տարածքները փոխանցել, որոնք, օրինակ, 44 օրվա կատաղի մարտական ​​գործողությունների ընթացքում այդպես էլ չեն գրավվել հակառակորդի զորքերի կողմից: