Ապատեղեկատվական գործողության հիմնական թիրախները երեքն են. Վարդան Ոսկանյան

Իրանագետ Վարդան Ոսկանյանը ֆեյսբուքյան իր էջում գրել է․

«Վերջին օրերին Բաքվի բռնապետի քարոզչամեքենայի կողմից տեխնոլոգիական բոլոր հնարքների կիրառությամբ ակտիվորեն շրջանառվում է ապատեղեկատվություն, թե իբր Իրանի տարածքով Սիրիայից և Իրաքից արցախյան հակամարտության գոտի են տեղափոխվում «Քրդստանի բանվորական կուսակցության» զինված ջոկատներ։

Մի կողմ թողնելով բուն ադրբեջանական ԶԼՄ-ների անդրադարձները, ուշագրավ է, որ կիրառվում է ապատեղեկատվության տարածման դասական սխեմա․ սեպտեմբերի 15-ին եգիպտական «Al-Qahira 24» լրատվական ռեսուրսում արաբերենով հրապարակվում է ապատեղեկատվական նյութը, այնուհետ դրա վրա հղմամբ և արդեն նոր շեշտադրումներով սեպտեմբերի 19-ին այն գրեթե ամբողջությամբ վերաշարադրվում է ընթերցողների լայն լսարան ունեցող «Gazeta.ru» ռուսալեզու կայքում, հետո նաև այլ վերաշարադրումներով տարածվում այլուր։

Ապատեղեկատվական գործողության հիմնական թիրախները երեքն են՝ հակահայկական քարոզչական ներգործություն արաբալեզու լսարանի վրա, նույնանման ազդեցություն ռուսալեզու լսարանի վրա և ամենահիմնականը՝ հակամարտության գոտում հնարավոր նոր թեժացումների դեպքում թուրքական միջամտության իրավաչափության տեղեկատվական ֆոնի ստեղծում, քանի որ «ՔԲԿ»-ն Թուրքիայում պաշտոնապես համարվում է ահաբեկչական կառույց։

Եթե գնահատենք ապատեղեկատվական այս «կարուսելի» կազմակերպման մակարդակը, ապա այն բավական բարձր է և արհեստավարժ, այլ հարց է, թե որքան գումար է ծախսվել դրա համար»։

#քարոզչություն