«Պոբեդան» դադարեցնում է դեպի Հայաստան չվերթները

«Պոբեդա» բյուջետային ավիաընկերությունը ձմեռային սեզոնից դադարեցնում է դեպի Գյումրի չվերթները: Այս մասին ՏԱՍՍ-ին հայտնել է ավիաընկերությունում անանուն աղբյուրը: Նրա խոսքով՝ չվերթների դադարեցման վերաբերյալ որոշման պատճառը կապված է Գյումրիի օդանավակայանում վառելանյութի պարբերական թերլիցքավորման հետ:

«Գյումրիի օդանավակայանում, ցավոք,  վառելանյութ մատակարարող ընկերությունը պարբերաբար թերլիցքավորում է կատարում: «Պոբեդան» բազմիցս դիմել է օդանավակայանի ղեկավարությանը՝ պահանջելով պարզել իրավիճակը: Սակայն օդանավակայանի միջոցառումներն անբավարար են, և վառելանյութ լիցքավորողը շարունակում է թերլիցքավորման պրակտիկան: «Պոբեդան» իր ծրագրած չվերթները դեպի Գյումրի կկատարի մինչև ամառային սեզոնի վերջը, որպեսզի իր հաճախորդներին  դժվար կացության մեջ չդնի, սակայն ձմեռային սեզոնից այս երթուղով տոմսերի վաճառքն արդեն իսկ  դադարեցված է»,- տեղեկացրել է աղբյուրը:

Նշենք, որ ընկերության պաշտոնական ներկայացուցիչը հաստատել է, որ վաճառքը դադարեցված է: