Երևանում տապալել են սեռական բռնության մասին մանկական գրքի շնորհանդեսը

Մի խումբ ակտիվիստներ տապալել են «Իմ մարմինն անձնական է» գրքի շնորհանդեսը, քանի որ, նրանց պնդմամբ, գիրքը մանուկների շրջանում այլասերում է տարածում: Միջոցառման ընթացքում հանդիպման վայր են ներխուժել մոտ 25 անձ, ովքեր խափանել են միջոցառումը:

Գիրքը նախատեսված է 3-6 տարեկան երեխաների և նրանց ծնողների համար։ Այն նկարներով պատմում է երեխայի մարմնին «վտանգավոր և «վատ» հպումների մասին»:

Վահագն Չախալյանը, ով նույնպես ակտիվիստների թվում է եղել, այս գործով ոստիկանություն են կանչել:

«Հրատապությանը» հղում անելով՝  հետաքննիչը չհամաձայնվեց, որպեսի երկուշաբթի մոտենամ: Հավաքվելու անհրաժեշտություն չկա, ես փաստաբանի հետ կմոտենամ, հետագա զարգացումների մասին կտեղեկացնեմ:

Հ.գ. Մեր գործն արդար է, ինչ անում ենք, մեր երեխաների ապագայի համար ենք անում, Պայքար մինչև հաղթանակ:

Հ.հ.գ. ԴԵՄ Եմ ԱԶԳԻՍ ֆիզիկական ոչնչացմանը, դեմ եմ 21-րդ դարի «փափուկ ուժով ցեղասպանությանը»,-գրել է նա:

Միջոցառման կազմակերպիչներից «Սեռական բռնության ճգնաժամային կենտրոն» ՀԿ-ի պնդմամբ՝ գիրքն իրազեկում է՝ նպատակ ունենալով կանխարգելել երեխաների նկատմամբ սեռական բռնությունը:

«Նրանց շարքերում են եղել Լիա Ավետիսյանը, Հայկ Այվազյանը, Հայկ Նահապետյանը և այլք: «Բուկինիստ» սրճարանի մուտքի մոտ մի շարք տղամարդիկ, այդ թվում՝ նաև Վահագն Չախալյանը, մասնակիցների ուղղությամբ ձվեր են նետել»,-ասված է ՀԿ-ի հաղորդագրության տեքստում:

Հասարակական գործիչ Նարեկ Մալյանը ԱԺ մարդու իրավունքների պաշտպանության հանձնաժողովի նախագահ Նաիրա Զոհրաբյանի ուշադրությունն է հրավիրել գրքի շնորհանդեսի խափանման փորձի վրա: Մալյանը իր ֆեյսբուքյան էջում գրել է.

«Հիմա շատ հետաքրքիր կլիներ լսել ԱԺ մարդու իրավունքների պաշտպանության հանձնաժողովի նախագահ Նաիրա Զոհրաբյանի տեսակետը սեռականություն կետ օրգ կայքի հիմնադիրների կողմից Խնկո Ապոր գրադարանում 3-6 տարեկան երեխաներին ուղղված սեռական գիտելիքների գրքի շնորհանդեսին:

Տիկին Զոհրաբյան, տեսնենք՝ այդքան «դուխ» կունենաք այս հարցին պատշաճ արձագանքելու: Թե մեր երկրում պաշտպանվում են միայն յուբկով տղամարդկանց իրավունքները»:

Գրառումից հետո ԲՀԿ խմբակցության անդամ Նաիրա Զոհրաբյանն արձագանքել է.

«Փաստորեն, Նարեկ Մալյանը որոշել է կասկածել իմ «դուխին» և սկզբունքայնությանը և ահա թե ինչ գրառում է արել իր էջում, որին հիմա կպատասխանեմ:

Կարծում եմ, այս տարիների ընթացքում ես որևէ մեկին առիթ չեմ տվել կասկածելու հատկապես իմ սկզբունքայնության եւ «դուխի»վրա:

Այո, պարոն Մալյան, երեկվանից ես բազմաթիվ ծնողներից և նաև «Կամք» հասարակական կազմակերպությունից ահազանգ եմ ստացել, որ «Բուկինիստ» գրախանությում ձեր նշած գրքի շնորհանդեսն է: Գիրքը ես չեմ տեսել և այն ինձ մոտ կլինի վաղը: Հասկանում եք, որ առանց գրքի բովանդակությանը ծանոթանալու, այս պահին իմ կողմից որևէ հայտարարություն անելը անլուրջ կլիներ: 

Ավելին, ես պատրաստ եմ Մարդու իրավունքների մեր հանձնաժողովի անդամների հետ քննարկել և հանձնաժողով հրավիրել թե՛ գրքի հեղինակներին, թե՛ նրանց օպոնենտներին, ու նաև ծնողներին, եթե, իհարկե, այդ քննարկումը ճակատամարտի չի վերածվի: 

Դուք վստահաբար արդեն հասկացել եք, որ ձեր նշած հարցի և ընդհանրապես՝ շատ տարբեր հարցերի վերաբերյալ մեր հանձնաժողովում կարծիքները խիստ տարբեր են: Ինչ վերաբերվում է ինձ, ապա գոնե դուք լավ գիտեք, որ չկա աշխարհում որևէ պաշտոն կամ մանդատ, հանուն որի ես դառնամ մանկուրտ: 

Լսեք էլ՝ չհավատաք: Եվ որ «դուխիս» վրա չկասկածեք՝ իմ էջում դնում եմ նաև ձեր գրառումը»։

 «ԿԱՄՔ» հասարակական նախաձեռնությունը դեպքի առթիվ հայտարարություն է տարածել, որում նշվում է․

«Հայկական արժեքների պաշտպանության «ԿԱՄՔ» հասարակական նախաձեռնությունը սույնով հայտարարում է, որ սկսված պայքարն առաջիկայում էլ ավելի է թեժանալու:

 Ա'րդ, դիմում ենք հայ հասարակության բոլոր շրջանակներին, յուրաքանչյուր ավանդապաշտ հայ անհատի, հանուն մեր երեխաների, միանալ հայկական ավանդական արժեքների համար տարվող պայքարին:

Այսօր Հայաստանում այլասերված փոքրամասնությունը փորձում է իր կամքը պարտադրել բացարձակ մեծամասնությանը: Մենք երդվել ենք` թույլ չենք տալու, որովհետև նոր-ազատական անվերահսկելի քարոզարշավը հակասում և սպառնում է ոչ միայն մեր մշակույթին  ու կենցաղին, այլև մեր երկրի սահմանադրությանը:

 Կոչ ենք անում մեր համաքաղաքացիներին Հայաստանի Հանրապետության օրենքի սահմաններում բացահայտել այլասերող գործողություններն ու  մատնացույց անելով  կատարողներին` նրանց գամել ամոթանքի սյունին: 

Իսկ Հայաստանի Հանրապետության իշխանություններին կոչ ենք ուղղում` փրկել թավշյա հեղափոխության ձեռբերումները` իր շարքերից հեռացնելով սորոսականներին ու այլասերվածներին:

 Արդար, ներառողական և հավասար հասարակության կառուցման գործընթացի տերը մեր ազգն է, մեր ավանդապաշտ, պատասխանատու, հայրենասեր և հպարտ հայ քաղաքացին»:

ՀՀ աշխատանքի և սոցիալական հարցերի նախարար Զարուհի Բաթոյանը դատապարտում է «Իմ մարմինն անձնական է» գրքի շնորհանդեսի տապալումը: Այս մասին նա գրել է ֆեյսբուքյան էջում:

«Խստորեն դատապարտում եմ այսօր «Բուկինիստ» սրճարանում տեղի ունեցածը, երբ փորձ է արվել խափանել «Սեռական բռնության ճգնաժամային կենտրոն» ՀԿ-ի կազմակերպած «Իմ մարմինն անձնական է» գրքի շնորհանդեսը: Մի գրքի, որի նպատակն է կանխարգելել երեխաների նկատմամբ սեռական բռնությունը։

Քննչական կոմիտեի տվյալների համաձայն՝ 2017 թվականին քննված սեռական բնույթի 161 հանցագործություններից 101-ը երեխաների նկատմամբ է եղել։

Բռնության դեմ պայքարի ամենաարդյունավետ ճանապարհը կրթությունն է։ Առանց ծնողների և երեխաների իրազեկությունը բարձրացնելու անհնար է պաշտպանել նրանց։ Վերը նշված կազմակերպությունը նախարարության միակ գործընկերն է, որը Հայաստանում մատուցում է մասնագիտացված ծառայություններ սեռական բռնության ենթարկված անձանց:

Կազմակերպության ջանքերով 2013 թ. ՀՀ քրեական օրենսգրքում փոփոխություններ կատարվեցին, և ավելի խիստ պատասխանատվություն սահմանվեց անչափահասների նկատմամբ սեռական բռնության հանցագործությունների համար:

Մեր գործընկեր կազմակերպությունները, որոնք աջակցում են մեզ մեր պարտավորությունները իրականացնելու հարցում, պիտի կարողանան իրենց դժվար աշխատանքն անել մի միջավայրում, որտեղ չկա բռնություն կամ բռնության սպառնալիք իրենց և իրենց ընտանիքի անդամների նկատմամբ: Բռնությունը չարիք է, իսկ անտեղյակությունը և ապատեղեկատվության տարածումը` պարարտ հող չարիքի արմատավորման համար»,-գրել է նախարարը: