Ամերիկյան «ահաբեկչության դեմ պատերազմը» խլել է կես միլիոն մարդու կյանք

2001 թվականի սեպտեմբերի 11-ի ահաբեկչական հարձակումներից հետո սկսված ամերիկյան «ահաբեկչության դեմ պատերազմի» հետևանքով Իրաքում, Աֆղանստանում և Պակիստանում մահացել է մոտ կես միլիոն մարդ: Այս մասին նշված է Բրաունի համալսարանին առնընթեր Ուոթսոնի միջազգային և հասարակական հարցերի ինստիտուտի հետազոտության մեջ, գրում է Topwar.ru-ն։

Ըստ Հետազոտողների՝ զոհերի թիվը 480 հազարից 507 հազար է, բայց փաստացի թիվը, հավանաբար, շատ ավելին է:

Զոհվածների թվում են ապստամբները, տեղական ոստիկանության և անվտանգության ուժերի աշխատակիցները, քաղաքացիական անձինք և ամերիկյան ու դաշնակից զորքերի զինվորականներ:

Զեկույցի հեղինակ Նեթ Քրոուֆորդը չի բացառում, որ զոհվածների թվում, որոնց ԱՄՆ-ն և տեղական ուժերը զինյալ են անվանում, կան քաղաքացիական անձինք:

Հետազոտության մեջ նշվում է՝ Իրաքում զոհված քաղաքացիական անձանց թիվը տատանվում է՝ 182 272 և 204 575, 38 480 մարդ զոհվել է Աֆղանստանում եւ 23 372՝ Պակիստանում: Իրաքում և Աֆղանստանում զոհվել է մոտ 7 հազար ամերիկացի զինծառայող:

Հաշվարկի մեջ չեն ներառվել նրանք, ովքեր զոհվել են պատերազմի հետևանքների պատճառով, օրինակ՝ հիվանդությունների տարածման և ենթակառուցվածքների կործանման: