Մեկնարկել է Green Card-ի հայտերն ընդունելու փուլը

Ամբողջ աշխարհում տասնյակ հազարավոր մարդիկ այս ամիս հնարավորություն կունենան փորձելու իրականացնել իրենց «ամերիկյան երազանքը»։ ԱՄՆ Պետքարտուղարությունը հայտարարել է Green Card ամենամյա վիճակախաղի հայտերն ընդունելու մեկնարկի մասին։ Այս մասին հաղորդում է «Ամերիկայի ձայնը»: Green Card-ը շահողներին հնարավորություն կտա ԱՄՆ-ում մշտական բնակության իրավունք ստանալու։

Պետքարտուղարության հայտարարության մեջ նշվում է, որ վիճակախաղի ընթացքում կխաղարկվի 50 հազար վիզա, որոնք հնարավոր կլինի ստանալ 2020 ֆինանսական տարում (սկսվում է 2019-ի հոկտեմբերի 1-ից և ավարտվում է 2020-ի սեպտեմբերի 30-ին):

Վիզաները կարող են շահել աշխարհի 6 աշխարհագրական մակրոշրջաններից մեկում ծնված մարդիկ: Շահողներին  որոշում են պատահական ընտրության միջոցով:

Այս տարի վիճակախաղին մասնակցելու սահմանափակումներ են մտցված այն մարդկանց համար, ովքեր ծնվել են Բանգլադեշում, Բրազիլիայում, Կանադայում, Չինաստանում (բացի Հոնկոնգից, Մակաոյից և Թայվանից), Կոլումբիայում, Դոմինիկյան հանրապետությունում, Սալվադորում, Հաիթիում, Հնդկաստանում, Ճամայկայում, Մեքսիկայում, Նիգերիայում, Պակիստանում, Պերուում, Ֆիլիպիններում, Վիետնամում և Մեծ Բրիտանիայում (բացառությամբ Հյուսիսային Իռլանդիայի):

Այս սահմանափակումները պայմանավորված են նրանով, որ վերջին 5 տարիների ընթացքում այս երկրներից ավելի քան 50 հազար մարդ մշտական բնակություն է հաստատել ԱՄՆ-ում։

Առցանց գրանցումը սկսվել է երեքշաբթի՝ հոկտեմբերի 2-ին եւ կավարտվի նոյեմբերի 6-ին: Խաղարկությանը մասնակցող ոչ մի երկիր չի կարող բոլոր խաղարկվող վիզաների 7 տոկոսից ավելին ստանալ: