Կրասնոյարսկում ուղղաթիռ է վթարվել. կա 18 զոհ

Կրասնոյարսկի շրջանում՝ Վանկորի հանքավայրի մոտ, վթարվել է «Մի-8» ուղղաթիռը: Դեպքի հետևանքով 18 մարդ է մահացել: Այս մասին «ՌԻԱ Նովոստի»-ին հաղորդել են տարածաշրջանի արտակարգ իրավիճակների ծառայությունները:

ԱԻՆ-ի տվյալներով՝ վթարը տեղի է ունեցել Իգարկա բնակավայրից երկու կիլոմետր հեռավորության վրա տեղական ժամանակով 10:20-ին: Ուղղաթիռն ընկել է ամայի վայրում: Վթարից հետո հաջողվել է հայտնաբերել երկու «սև արկղը», դրանք այժմ ուսումնասիրվում են:

Ուղղաթիռն ընկել և այրվել է: Վթարից հետո պայթել են ուղղաթիռի վառելիքային բաքերը:

Քննչական կոմիտեն հաղորդել է, որ ուղղաթիռում անձնակազմի երեք անդամ է եղել և 15 հերթափոխի աշխատող: Նախնական տվյալներով՝ ուղղաթիռի կործանման պատճառ կարող էր դառնալ տեխնիկական անսարքությունը կամ օդաչուի սխալը: Դեպքի առթիվ հարուցվել է քրեական գործ՝ անվտանգության կանոնները խախտելու մասին հոդվածով: