Վահան Քերոբյանը չի բացառում, որ թուրքերն էլ կգան և ՀՀ քաղաքացիություն կստանան

Օտարերկրյա ներդրումները միշտ խրախուսվում են Հայաստանում, և մասնավոր անձանց կողմից կատարվող ներդրումները նույնքան խրախուսված են, որքան մեծ ընկերությունների: Լրագրողների հետ ճեպազրույցում ասաց Էկոնոմիկայի նախարար Վահան Քերոբյանը:

«Այս նախագծով մենք ուզում ենք օգտվել այն հնարավորություններից, որոնք կան աշխարհում: Սրանով լուծվում է միանգամից երկու հարց՝ Հայաստանում իմիգրացիայի հարցը և ներդրումների միջոցով ՀՀ տնտեսության զարգացումը ևս շատ կարևոր է մեզ համար»:

Հարցին՝ մտավախություն չկա՞, որ այդ ներդրումները կանեն Թուրքիայի, Ադրբեջանի քաղաքացիները՝ դառնալով ՀՀ քաղաքացի, Քերոբյանը պատասխանեց. «Խոսքը չի գնում այն մասին, որ ով դիմի, կստանա: Բնականաբար անհրաժեշտ ընթացակարգերը՝ թե' ոստիկանության, թե' ԱԱԾ կողմից կատարվելու են: Ես կարծում եմ, որ այդ մտավախություններն այդ մակարդակում ամբողջությամբ կչեզոքացվեն, և չի լինի այնպիսի իրավիճակ, որով կունենանք չափից ավելի երկքաղաքացիներ՝ Հայաստանի և Թուրքիայի քաղաքացիություն ունեցող»: