30 12 2021

Գերությունից վերադարձածների նկատմամբ քրգործերը քաղաքական քննարկման առարկա չպետք է լինեն. ՄԻՊ

Գերությունից վերադարձածների նկատմամբ քրգործերը քաղաքական քննարկման առարկա չպետք է լինեն. ՄԻՊ

Գերությունից վերադարձած զինվորականների նկատմամբ հարուցված քրեական գործերը չպետք է դառնան քաղաքական քննարկման առարկա, «Սպուտնիկ Արմենիա»-ի հետ զրույցում ասել է ՀՀ ՄԻՊ Արման Թաթոյանը։

Ըստ պաշտպանի` կալանավորումները համոզիչ չեն, դրանց իրավաչափությունը կասկածներ է հարուցում։ Այս մասով պաշտպանն արդեն իսկ հարցադրումներ է ուղարկել գործը քննող իրավապահ մարմիններին` բացատրություն պահանջելով։

Թաթոյանը հավելել է, որ քրեական գործ հարուցելը կարևոր է, կան դեպքեր, երբ նույնիսկ անհրաժեշտ է, բայց խնդրահարույց է կալանավորելը։ Մանավանդ, որ կալանավորումներին նախորդել են օրենսդիր ու գործադիր մարմինների պաշտոնյաների հայտարարությունները, որոնք վատ վիճակի մեջ են դրել քրեական հետապնդման մարմիններին ու դատարաններին։

 «Հիմա այդ մարմիններն ավելի բարձր շեմով պետք է հաղթահարեն կալանքի անհրաժեշտությունը և հիմնավորեն, որ կալանքը կապ չունի պաշտոնյաների հնչեցրած հայտարարությունների հետ», - նշել է նա։

Պաշտպանը նաև ընդգծել է, որ հայ գերիներին վերադարձնելը ադրբեջանական իշխանությունների բարի կամքի դրսևորումը չէ, այլ միջազգային պահանջ, որը չի կատարվում։

«Ադրբեջանական իշխանությունները զբաղված են մարդկանց առևտրով։ Մենք դա մի քանի անգամ ապացուցել ենք` թեկուզ թարգմանելով Ադրբեջանի նախագահի և Թուրքիայի առաջին տիկնոջ զրույցը», - նշել է Թաթոյանը։

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ