Ո՞վ է այդ հրամանը տվել, որի պատճառով մեր զինվորները հայտնվեցին ազերիների ձեռքում, իսկ ոմանք՝ գնդակահարվեցին... Գագիկ Համբարյան

Քաղաքագետ Գագիկ Համբարյանը ֆեյսբուքյան իր էջում «Ականապատ դաշտերի քարտեզների տալը Բաքվին՝ բարի կամքի դրսևորում, թե՞ դավադիր ծրագրի մի մաս» վերտառությամբ գրառում է արել, որում ասվում է․

«Մեծ ուրախությամբ տեղեկացա, որ երեկ ևս 15 գերեվարվածներ վերադարձան Հայաստան...

Այդ կապակցությամբ ՀՀ կառավարությունը և Ադրբեջանի ԱԳՆ-ն իրար հակասող հայտարարություններ են արել...

Պաշտոնական Բաքուն բացահայտ նշել է, որ 15 գերիների ազատման համար պայման է եղել Վարանդայի (Ֆիզուլի) և Կովսականի (Զանգելան) շրջանների ականապատ դաշտերում տեղադրված 92 հազար տարբեր տեսակի ականների տեղադրման քարտեզների տրամադրումը, որը Նիկոլը կատարել է... Ավելին, Հայաստանը կապիտուլյացիայի տարած Նիկոլը չէր էլ կարող չկատարել Իլհամ Ալիևի նախապայմանները...

Մինչ Բաքուն բացահայտում է, որ գերիների վերադարձի դիմաց Երևանից ստանում է իրեն անհրաժեշտ ականապատ դաշտերի քարտեզները, դավաճան Նիկոլը կրկին փորձում է կեղծել իրականությունը և մանիպուլյատիվ հայտարարություններ է տարածում...

ՀՀ կառավարությունը հայտարարել է, որ 15 գերիների դիմաց "բարի կամք դրսևորելով Ադրբեջանին է փոխանցել Ֆիզուլիի և Զանգելանի շրջանների ականապատ դաշտերի քարտեզները"...

Նախ, աչքի է ընկնում ՀՀ կառավարության հայտարարության մեջ այն, որ Արցախի օկուպացված տարածքները պաշտոնական Երևանն անվանում է ադրբեջանական տեղանուններով՝ Վարանդան կոչելով Ֆիզուլի, իսկ Կովսականը՝ Զանգելան...

Երկրորդը, շատ հետաքրքիր է, իսկ եթե այդ քարտեզները Երևանը չտրամադրեր Բաքվին, ապա Իլհամ Ալիևը որևէ գերու կտրամադրեր մեզ... Իհարկե՝ ոչ...

Հայաստանի կառավարության այս հայտարարությունն ուղաղկի ծիծաղ է առաջացնում գործից տեղյակ մարդկանց մոտ...

Վերջին մեկ ամսում 30 գերիների դիմաց Հայաստանը Ադրբեջանին է տրամադրել Ակնայի, Կովսականի և Վարանդայի շրջանների մոտ 200 հազար տարբեր տեսակի ականների տեղադրման քարտեզները... Այս հույժ գաղտնի տեղեկությունների տրամադրումն Իլհամ Ալիևին կհանգեցնի նրան, որ պաշտոնական Բաքուն, որին 10-15 տարի էր պետք այդ տարածքներն ականներից մաքրելու համար այդ ամենը կիրականացնի շատ արագ, որը աղետալի հետևանքներ է ունենալու Հայաստանի և Արցախից մնացած մասի համար...

Ինձ մոտ այնպիսի տպավորություն է, որ հարյուրից ավել մեր տղաների գերության մեջ հայտնվելը Հադրութի շրջանի Հին Թաղեր և Խծաբերդ գյուղերի մոտ դիտավորյալ կազմակերպված դավադրություն էր...

Զարմանալի է, եթե այդ գյուղերն, ըստ Նիկոլի և Ալիևի միջև ձեռք բերված բանավոր համաձայնության անցնելու էին ադրբեջանցիներին, ապա ինչու՞ էին մեր տղաներին ուղարկում այդտեղ... Ո՞վ է այդ հրամանը տվել, որի պատճառով մեր զինվորները հայտնվեցին ազերիների ձեռքում, իսկ ոմանք՝ գնդակահարվեցին...

Գերիների շուրջ վերջին գործընթացներից գալիս եմ այն եզրակացության, որ մեր տղաները հայտնվել են գերության մեջ, որպեսզի ոմանք նրանց ազատելու պատրվակի ներքո հույժ գաղտնի և շատ կարևոր տեղեկություններն Ադրբեջանին տրամադրելով քողարկեն իրենց դավաճանությունը...

Շատ կասկածելի կլիներ, եթե դավաճան Նիկոլն այդ քարտեզները հենց այնպես նվիրեր Իլհամ Ալիևին, իսկ այսպես՝ գերիների ազատագրման դիմաց դրանք ադրբեջանցիներին տալը, շատ հարմար և նույնիսկ իշխանություններին դիվիդենտներ ապահովող քայլ է...

Չեմ զարմանա, եթե հետագայում գերիներին ազատելու պատրվակով Նիկոլն Իլհամ Ալիևին նվիրի նաև Բերձորի, Որոտանի, Քարվաճառի, Հադրութի և այլ տարածքների ականապատ քարտեզները ևս...»։