Հրաժարական է տվել Հակոբ Արշակյանը

Yerevan.Today-ին հայտնի է դարձել, որ երեկ ուշ գիշերին հրաժարական է տվել Բարձր տեխնոլոիգիաների արդյունաբերության նախարար Հակոբ  Արշակյանը:

Սա, ըստ մեր ունեցած տվյալների, երկրորդ գրավոր դիմումն է՝ մեկ ամսում, որ դրվել է վարչապետ Նիկոլ Փաշինյանի սեղանին: Նախորդ դեպքում Նիկոլ Փաշինյանին և  Տարածքային կառավարման նախարար Սուրեն Պապիկյանին հաջողվել է համոզել ԲՏԱ նախարարին՝ հետ կանգնել որոշումից, սակայն երեկ գիշերը՝ ժամը 23։00-ին, ըստ մեր աղբյուրի, հրաժարականը ստորագրվել է վարչապետի կողմից:

Ի դեպ, հիասթափեցնելով մեր հայրենակիցներին՝ հայտնենք, որ Հակոբ Արշակյանի հրաժարականի պատճառը ամենևին էլ Աբու Դաբիում հունվարին կայացած DEX -2021  ռազմարդյունաբերական ցուցահանդեսին զինանմուշների փոխարեն բուկլետներով մասնակցության խայտառակ պատմությունը չէ և ոչ էլ լրագրող Փայլակ Ֆահրադյանին ռեստորանում ապտակելու աղմկահարույց միջադեպը։ Իրականում խոսվում է քաղաքական դրդապատճառների մասին: Արշակյանը հիասթափված է, իսկ սա թիմի ներսում քաղաքական պատասխանատվությունից փախուստ են որակում:

Ստացվում է՝ ընտրությւոնների շեմին Նիկոլ Փաշինյանի ղեկավարած թիմը լքում է ոչ միայն իրեն ամենից հարազատ կուսակցականը, այլև քաղաքացիական պայմանագիր կուսակցության վարչության անդամը, իսկ սա նշանակում է՝ իշխանական բուրգն ու կուսակցությունը բացահայտ կերպով ճաքեր է տալիս: Նշենք, որ Հակոբ Արշակյանը Նիկոլ Փաշինյանի ամենավստահելի թիմակիցն է՝ Լիլիթ Մակունցից հետո և Արսեն Թորոսյանից առաջ։

Մեր ստացած ինֆորմացիան Կառավարությունն այսպես է պարզաբանում․ «Այս պահին նման ինֆորմացիա չկա, կադրերի բաժնում Հակոբ Արշակյանից դիմում չի ստացվել»։

Փորձեցինք կապ հաստատել նաև Հակոբ Արշակյանի հետ, բայց մեր զանգերն անպատասխան մնացին։

Սյուզի Բադոյան