Ցույցերի ժամանակ 2 քաղաքացի է մահացել․ Բելառուսի առողջապահության նախարար

Բելառուսում ընդդիմության կողմնակիցները կրկին հավաքվել են Մինսկի Անկախության հրապարակում: Այս մասին հայտնում է  РИА Новости-ն։

Հավաքվածները բողոքական երգեր են երգում և կարգախոսներ հնչեցնում: Թղթակցի գնահատմամբ՝ հրապարակում մի քանի հազար մարդ է հավաքվել:

Բելառուսում բողոքի ցույցերն անցկացվում են 9-րդ օրն անընդմեջ: Քաղաքացիներն իրենց դժգոհությունն են հայտնում օգոստոսի 9-ին կայացած նախագահական ընտրությունների արդյունքներից, որոնց համաձայն՝ հաղթող է ճանաչվել երկրի գործող նախագահ Ալեքսանդր Լուկաշենկոն:

Պաշտոնական տվյալներով՝ ցույցերի առաջին օրերին ավելի քան 6,7 հազար մարդ է ձերբակալվել։ Ինչպես հաղորդել է հանրապետության ՆԳՆ-ն, անկարգությունների ընթացքում տուժել են հարյուրավոր մարդիկ, այդ թվում՝ իրավապահ մարմինների ավելի քան 120 աշխատակիցներ։  

Բելառուսի նախագահ Ալեքսանդր Լուկաշենկոն հայտարարել է, որ ընդդիմությանն աջաջարկել էր նախագահական ընտրություններից հետո ձայների վերահաշվարկ անել: Լուկաշենկոյի խոսքով՝ ընդդիմությունը հրաժարվել է և պնդում է, որ նոր ընտրություններ անցկացվեն:

Բողոքի ցույցերի ժամանակ երկու մարդ է մահացել: РИА Новости-ի փոխանցմամբ՝ այս մասին հայտնել է առողջապահության նախարար Վլադիմիր Կարանիկը: