09 05 2020

Հորդորում ենք Անդրանիկ Քոչարյանին զսպել անձնական հակակրանքները. «Մեդիա պաշտպան»

Հորդորում ենք Անդրանիկ Քոչարյանին զսպել անձնական հակակրանքները. «Մեդիա պաշտպան»

«Մեդիա պաշտպան» նախաձեռնությունն անդրադարձել է ԱԺ «Իմ քայլը» խմբակցության պատգամավոր Անդրանիկ Քոչարյանի՝ լրագրողների հետ ունեցած հարցուպատասխանին, որը հաջորդել է այսօր խորհրդարանում տեղի ունեցած ծեծկռտուքին: «Մեդիա պաշտպան» նախաձեռնությունն այս առիթով գրել է.

«Այսօր` մայիսի 8-ին, Ազգային ժողովում լրագրողների հետ հարցուպատասխանի ժամանակ Անդրանիկ Քոչարյանը, պատասխանելով «Ազատություն» ռադիոկայանի լրագրողի հարցին` կապված վարչապետի այն խոսքին, որ «իշխանությունն ամեն օր դառնում է բռնության զոհ սերժական, քոչարյանական հանցավոր բանդայի և նրանց խորհրդարանական սպասարկուների կողմից», ասաց. «Ավելի ընդհանրական գնահատական տվեց վարչապետ Փաշինյանը, և մենք ամեն օր դա տեսնում ենք տարբեր դրվագներով: Էնպես որ, ես չեմ էլ մանրանում, դրանց գնահատականներից, ամբողջացրած, թե ինչ պատկեր է և սադրանքների ինչպիսի համախմբված գործընթաց է սկսվել, բոլորդ էլ տեսնում եք: Էստեղ (խմբ.՝ հայացք է նետում լրագրողներից մեկի բեյջին) կան հեռուստաընկերություններ, որոնք մասնակից են նաև էդ ամեն բոլոր գործողություններին»:

Այնուհետև Անդրանիկ Քոչարյանը նշեց, որ խոսքը 5-րդ ալիքի մասին է:

Սա իշխող խմբակցության պատգամավորի հերթական վիրավորական արտահայտությունն է լրագրողների հասցեին: Մենք բազմիցս կոչ ենք արել պարոն Քոչարյանին մնալ կոռեկտության սահմաններում, քանի որ նման պահվածքը հարիր չէ պաշտոնյային:

«Մեդիա պաշտպան» նախաձեռնությունը հորդորում է Անդրանիկ Քոչարյանին զերծ մնալ լրագրողների հասցեին գնահատատականներ հնչեցնելուց, զսպել անձնական հակակրանքները»:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ