Հայոց ցեղասպանության 105-րդ տարելիցն է

Ապրիլի 24-ին աշխարհը նշում է Հայոց ցեղասպանության 105-րդ տարելիցը: Հայաստանում, Արցախում ու Սփյուռքում հայերը և առաջադեմ մարդկությունը հիշում են 20-րդ դարի առաջին Ցեղասպանության զոհերին:

Հայոց ցեղասպանության հիշատակի օր է համարվում ապրիլի 24-ը, սակայն ցեղասպանությունը կատարվել է 1892-1923 թվականներին:

Հայոց ցեղասպանության հետևանքով աշխարհի բոլոր ծագերում առաջացավ Հայկական Սփյուռքը, որը մինչ օրս պայքարում է Ցեղասպանության ճանաչման և հատուցման համար:

Հայոց ցեղասպանությունը մինչ օրս ճանաչել է 24 երկիր, տարբեր երկրների նահանգներ ու քաղաքներ, միջազգային կազմակերպությունների բազմաթիվ բանաձևեր կան:

Հայաստանի Հանրապետությունը 2015 թվականին՝ Ցեղասպանության 100-ամյա տարելիցին, ընդունեց Հայոց ցեղասպանության 100-րդ տարելից համահայկական հռչակագիրը, 2015-ի ապրիլի 12-ին Վատիկանի Սուրբ Պետրոս տաճարում անցկացվեց Հայոց ցեղասպանության զոհերի հիշատակին նվիրված պատարագ, Սուրբ Էջմիածնում էլ տեղի ունեցավ Հայոց Ցեղասպանության 1. 5 միլիոն զոհերի սրբադասման արարողություն: 

Այս տարի առաջին անգամ Ծիծեռնակաբերդի բարձունքը մարդաշատ չի լինի։ Կորոնավիրուսի համավարակով պայմանավորված՝ դեպի հուշահամալիր տանող բոլոր ճանապարհները փակ են մինչև ապրիլի 25-ը՝ ժամը 22-ը։ 

Ապրիլի 24-ին՝ ժամը 08:00-ից սկսած, քաղաքացիները կարող են հաղորդագրություն ուղարկել 1915 կարճ համարին Հայաստանից, և 0037433191500՝ արտասահմանից։ Հաղորդագրություն ուղարկած քաղաքացիների անունները կարտացոլվեն հուշահամալիրի սյուներին` այդպիսով ազդարարելով իրենց խորհրդանշական մասնակցությունը և հարգանքի տուրքը Սուրբ նահատակների հիշատակին։