Փաշինյանը՝ Կարագանդայի դեպքերի, գազի գնի և ԱԺ-ում ընդդիմադիր փոխնախագահի մասին

Վարչապետի պաշտոնակատար Նիկոլ Փաշինյանը ԱԺ «Իմ քայլը» խմբակցության նիստից հետո լրագրողների հետ զրույցում պատասխանել է արտաքին և ներքին քաղաքականության ակտուալ հարցերին։

Անդրադառնալով Ղազախստանի Կարագանդա քաղաքում տեղի ունեցած մահվան ելքով բախման միջադեպին, ինչի մեջ հայեր են կասկածվում՝ Նիկոլ Փաշինյանը նախ ցավակցություն է հայտնել զոհվածի հարազատներին:

«Ուզում եմ ընդգծել, որ այդտեղ չի կարող լինել ազգամիջյան որևէ կոնտեքստ, որովհետև որքան ինձ են զեկուցել, կոնֆլիկտ ունեցած երկու խմբերն ազգային առումով միատարր չեն եղել, և դանակահարող խմբի մեջ ազգությամբ ղազախ քաղաքացի է եղել»,- ասաց նա և նշեց, որ տարբեր վարկածներ և լուրեր են դրվում շրջանառության մեջ՝ լրագրողներին կոչ անելով ստուգել դրանք:

Անդրադառնալով հնչող գնահատականներին, թե գազի գնի հարցով առկա բանակցությունները ՀՀ իշխանությունների պարտությունն են, Փաշինյանն ասաց․

«Մենք շարունակելու ենք բանակցությունները և ամեն ինչ անելու ենք մեր երկրի շահերը պաշտպանելու համար: Իսկ ի՞նչն է պարտությունը»։

Ինչ վերաբերում է Իրանից գազ բերելուն, վարչապետի պաշտոնակատարն ասաց, որ այդ հարցը միշտ քննարկվել, քննարկվում է և կքննարկվի, քանի դեռ կոնկրետ և ձեռնտու լուծում չի գտնվել:

Ինչ վերաբերում է խմբակցության նիստի օրակարգին, Փաշինյանը նշել է, որ Կառավարության հավանական կազմը չեն քննարկել։

Ինչ վերաբերում է հարցին, թե ԱԺ փոխնախագահի պաշտոնն ընդդիմությունից որ ուժինը պետք է լինի, Փաշինյանն ասաց. «Խմբակցությունում այդ հարցի քննարկմանը չենք հասել, բայց սկզբունք պետք է գործի, որ ընդդիմությունից ԱԺ փոխնախագահն ընտրվի այն կուսակցությունից, որն ընտրություններին ավելի շատ ձայն է հավաքել»: